Qumar Aqsaqalov kiris ákeletin daqyldardy egýge keńes berdi
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov jumys saparymen Tımırıazev aýdanyna bardy. Aımaq basshysy baspasóz qyzmetiniń málimetinshe, ákimniń birinshi barǵan nysany Dmıtrıev orta mektebi boldy.
Mektep 200 oqýshyǵa arnalǵan, alaıda, qazir munda 71 bala bilim alyp jatyr. Bıylǵy jyly birinshi synypqa 8 bala bardy. Mektep janynda mektepke deıingi daıarlyq toby jumys isteıdi. Oblys ákimi aýyl turǵyndarymen kezdesti.
Qumar Aqsaqalov kezdesýdi jergilikti bıliktiń aýyl sharýshalyǵy ónimderin óndirýshilermen birlesip turǵyndar ómiriniń sapasyn jaqsartýy máselesinen bastady.
«Atqarýshy bılik pen aýylsharýashylyǵy ónimin óndirýshiler birlesip aýyl turǵyndarynyń tabysyn arttyrýy tıis. Bul basty másele. Qazir biz ne isteı aldyq jáne alda qandaı ister atqarýymyz kerektigin sarapqa salamyz», - dedi aımaq basshysy.
Odan keıin Qumar Aqsaqalov Moskvoretskıı aýyldyq okrýginde boldy. Birinshi kezekte oblys ákimi Moskvoretskıı aýylyndaǵy áleýmettik mańyzy bar nysandarmen tanysty.
Qazirgi ýaqytta eldimekende dámhana qurylysy aıaqtalyp, jańa úıler salynyp jatyr. Qumar Aqsaqalov Moskvoretskıı orta mektebiniń materıaldyq-tehnıkalyq bazasymen tanysty. Mektep dırektory Qaıyrgeldi Qojınniń aıtýynsha, munda 22 pedagog jumys isteıdi, olardyń 8-i joǵary sanatty. Jańa oqý jyly qarsańynda 4 mýltımedıalyq kabınet jabdyqtaldy. Qazir 220 oryndyq oqý mekemesinde 67 bala oqyp jatyr.
Aımaq basshysynyń aýyl turǵyndarymen kezdesýi barysynda aýyl ákimi Svetlana Sobolevskaıa sóz aldy.
Kezdesýdi aıaqtaǵan Soltústik Qazaqstan oblysynyń ákimi Qumar Aqsaqalov issaparynyń qorytyndysyn shyǵardy.
«Egis alqaptaryn ártaraptandyrý qajet, demek kiris ákeletin ónimderdi ósirýdi qolǵa alatyn kez keldi. Qazirgi ýaqytta bıdaıdyń tonnasy 43 myń teńge turady, raps - 120 myń teńge, kúnbaǵys - 90 myń teńge, al, jasymyq - 200 myń teńge. Osy daqyldardy ósire otyryp, tıimdilikke qol jetkizip, turǵyndarǵa laıyqty eńbekaqy tólep, úı jáne basqa da nysandar turǵyzýǵa bolady», - dedi aımaq basshysy.
