Qumar Aqsaqalov kásipkerlikti qoldaý baǵyttaryndaǵy jumysty synǵa aldy
PETROPAVL. QazAqparat - Oblystyq ákimdikte ótken jıynda ınvestıtsııalyq jobalardy iske asyrý barysy talqylandy, dep habarlaıdy «QazAqparat» HAA tilshisi.
Jıynda oblys ákiminiń orynbasary Ratmır Ahmetovtiń óńirdegi mańyzdy jobalardyń kásipkerlikti qoldaý kartasy aıasynda iske asyrylyp jatqandyǵyn atap aıtty.
Ákim orynbasarynyń sózine qaraǵanda, kásipkerlikti qoldaý kartasyna bıyl 5 jańa joba kirgen. Onda jalpy somasy 65 mıllıard teńgeni quraıtyn 36 joba bar. Olardyń biri - Aıyrtaý aýdanynda «Syrymbet» AQ taý-ken-metallýrgııalyq kesheni.
Petropavlda bos ǵımarattary kóp óndiristik aýdandar bar. Olardyń bazasynda jańa kásiporyndar qurýǵa bolady eken. Osy rette oblys ákimi óńirde Kásipkerlikti qoldaý kartasyn iske asyrylý barysyn synǵa aldy.
Oblys ákimi Qumar Aqsaqalovtyń pikirinshe, kásipkerlikti damytýdy tıimdi tásilder asa qajet. Bes aýdanda jobalar múldem joq. Qytaı ınvestorlarymen birlesip josparlanǵan úsh jobanyń naqty bireýi ǵana iske asyrylǵan.
Ákimniń synyna qatysty R. Ahmetov óńirlik karta ózektendirilgendirilip jańa nysandar qosylǵandyǵyn, odan memlekettik qoldaý kórsetilmeıtin jobalar alynyp tastalǵandyǵyn tilge tıek etti.
«Men respýblıka boıynsha jaǵdaıdy qarap otyrmyn. Biz jobalardyń kópshiligin pysyqtaýdan ótkizbeı, tizimnen alyp tastaǵanmyz. Jobalardy iske asyrý barysynda sapanyń mańyzdy ekendigin esten shyǵarmaýymyz kerek», - dedi Qumar Aqsaqalov.
Budan basqa, oblys ákiminiń synyna memlekettik organdar saıttaryn aqparatpen toltyrý máselesi de ilikti.
«Internet-resýrstarda aýdan, qalalardyń ınvestıtsııalyq múmkindikteri týraly aqparat joq», - dedi ákim.
Jıyn sońynda óńir basshysy ınvestıtsııalardy tartý jumystaryn ózi tikeleı baqylaıtyndyǵyn jáne ol boıynsha tıisti basshylardyń esep berýleri qajettigin aıtty.
