Qumar Aqsaqalov dárigerlerge úı salyp bermek
ASTANA. QazAqparat - Soltústik Qazaqstan oblysynyń ákimi Qumar Aqsaqalov Petropavl qalasynda dárigerler úshin bólek turǵyn-úı salyp berýdi kózdeıdi, dep habarlaıdy QazAqparat tilshisi.
«Dál qazir biz aqsha izdep jatyrmyz. Petropavldyń qaq ortasynda salynady degen jospar bar. Búginde bizde kásibı dárigerler tapshy. Al olardy jumysqa shaqyrý úshin turatyn jerin daıyndap qoıý qajet. Sondyqtan medıtsına mamandaryna bólek bir úıdi salatyn shyǵarmyz. Naqty qansha oryn bolatyny ázirshe belgisiz. Aqsha tapqannan keıin aıta alamyz», - dedi Q.Aqsaqalov QazAqparat tilshisine bergen suhbatynda.
Ákimniń aıtýynsha, Soltústik Qazaqstanda 280-ge jýyq medıtsına mamandary jetispeı jatyr. Olardyń teń jartysy Petropavl qalasyna qajet. «Sosyn biz kópbeıindi aýrýhanany salý máselesin pysyqtap jatyrmyz. Ol jerde barlyq mamandar otyrady. Áıtpese, bir aýrýhanada arnaıy maman bolsa, ekinshisinde bolmaı jatady. Sodan halyq ary-beri shapqylap júredi. Al jańa aýrýhanada medıtsınalyq tekseristiń tolyq kesheni bolady. Sonyń arqasynda dárigerler naýqasty jan-jaqty zerttep, naqty dıagnoz qoıa alady», - dep atap kórsetti Q.Aqsaqalov.
Aıta keteıik, búgin Astanada ótken baspasóz máslıhatynda Q.Aqsaqalov rýhanı jańǵyrý sharalary boıynsha esep berdi. Sondaı-aq, oblys basshysy paramen ustalǵan basqarma basshysyna qatysty pikir bildirdi. Ákim ońtústikten kóship keletin jastarǵa úı salyp berýge daıyn ekenin jetkizdi.
