Kúmándi statıstıkalyq derekter qalaı esepteledi
Búgin Parlament Májilisinde QR Ulttyq ekonomıka birinshi vıtse-mınıstri Rýslan Dálenov statıstıka týraly jańa zań jobasyn tanystyrdy.
Májilisi otyrysynda «Aýyl» partııasy atynan májilismen Farıd Aqberdıev birinshi qajettiliktegi taýarlardyń qymbatshylyǵyna alańdaýshylyq bildirdi. Onyń aıtýynsha, óńirlerde ınflıatsııa týraly jarııalanyp jatqan organdardyń málimetteri kúmándi.
«Statıstıkaǵa súıensek, ınflıatsııanyń deńgeıi 7,1 paıyzdy quraǵan. Al azyq-túlikterdiń baǵasy 2017 jyly 6,5 paıyzǵa ǵana qymbattaǵan. Statıstıka vedomstvosy bul málimetti kúrdeli ádispen anyqtaıtyny túsinikti. Biraq qarapaıym azamat kez kelgen dúkenge kirse, statıstıka organdarynyń keltirgen baǵasyna sene almaıtyny shyndyq. Osyǵan baılanysty birinshi qajettiliktegi taýardy naqty baǵasynyń ósimin anyqtaýda tyń ádisterdi ázirlep jatyrsyz ba?» - dedi depýtat.
Májilismen óz sózinde mınıstrlik usynǵan statıstıkalyq málimetterdi túsinbeı qoıǵanyn aıtady.
«Bazarǵa baryp, qant 13 paıyzǵa, sarymsaq 41 paıyzǵa qymbattap ketkenin kóremin. Bári de baǵanyń 50-60 paıyzǵa deıin ósip jatatynyn biledi. Aýyl sharýashylyǵy mamandarynyń 90 paıyzy 150 myń teńgeden kem almaıtynyn, orman men balyq sharýashylyǵyndaǵy 88,3 myń teńge alady deısizder. Jambyl men OQO-ǵa baryp kórińizder - olar 50 myń teńge ǵana alyp júr», - dedi májilismen.
Depatýttyń suraǵyna Rýslan Dálenov jaýap berip, statıstıka degen - matematıka bolǵandyqtan, onymen pikirtalastyrý qıyn ekenin alǵa tartty.
«Men sizdi óte jaqsy túsinemin, qoldaımyn. Ózim de tutynýshylyq baǵanyń ındeksi (TBI) qandaı degen suraqqa jaýap izdegen edim. Ol - shynaıylyqty kórsetedi. Biz sáýir aıynda biz OKQ-da arnaıy shara ótkizip, túsindirdik. Agregatsııa jolymen statıstıka málimetteri, shynynda da, 7,1 paıyzdy (ınflıatsııany - avt.) kórsetedi. Bul - agregatsııa», - deıdi vıtse-mınıstr.
Rýslan Dálenov «barlyq másele agregatsııalardyń málimetterinde» ekenin aıtqan depýtattyń sózin qoldady.
«Sebebi, halyq ishindegi toptardyń azyq-túlikti tutyný kórsetkishi ár túrli. Barlyq adam ártúrli taýar satyp alady. Ortaq agregatsııa - árqashan ortaq kórsetkishti kórsetedi. 7,1 paıyzdyń ishinde 47 paıyzǵa nemese 28 paıyzǵa qymbattaǵan, bolmasa 3 paıyzǵa arzandaǵan da azyq-túlikter bar. Máselen, shashtaraz qyzmet quny bıyl múlde ósken joq. Demek, agregatsııa bári áser etedi», - deıdi Rýslan Dálenov.
