Kúmándi lotereıalardy uıymdastyrýǵa zańmen shekteý qoıylatyn boldy
ASTANA. 10 qazan. QazAqparat - Lotereıa qyzmeti zańmen rettelýi tıis. Osy maqsatta Úkimet «Lotereıalar jáne lotereıa qyzmeti týraly» jańa zań jobasyn Parlament Májilisiniń qaraýyna usyndy.
Osy zań jobasy Qazaqstan Respýblıkasynyń aýmaǵynda lotereıa qyzmeti salasyndaǵy qoǵamdyq qatynastardy retteıdi, osy qyzmetti uıymdastyrýdyń jáne ótkizýdiń tártibi men sharttaryn aıqyndaıdy. Sondaı-aq lotereıa qyzmetin memlekettik retteýdiń uıymdastyrýshylyq negizderin belgileıdi.
Úkimettiń zań jobasyna bergen bergen túsindirmesinde búgingi tańda lotereıa qyzmeti birqatar zańnamalyq jáne normatıvtik quqyqtyq aktilermen reglamentteletini atap ótilgen.
Táýelsizdik alǵan sátten bastap Qazaqstan Respýblıkasy lotereıa qyzmeti salasynda lıberaldy saıasatty ustandy. 1996 jyly ulttyq lotereıany engizgenge deıin eldiń aýmaǵynda tek jeke kompanııalar ótkizetin lotereıalar ǵana uıymdastyrylǵan.
Qazirgi ýaqytta naryqtyń memlekettik emes sektoryndaǵy 70 sharýashylyq júrgizýshi sýbektiniń lıtsenzııasy bar, onyń 15-i lotereıa qyzmetin júzege asyrady. Onyń ishinde ulttyq lotereıany uıymdastyrý jáne ótkizý jónindegi keńes dırektsııasy bar.
Lotereıa qyzmetinen túsetin qarajat týraly aıtar bolsaq, 2009 jyly lotereıany ótkizýden memlekettik bıýdjetke túsken salyq tólemderi men ózge de túsimderdiń kólemi 48 mln. teńgeni quraǵan. Osy kórsetkish 2010 jyly - 153 mln teńgege, 2011 jyly - 219 mln. teńgege jetken, al 2012 jyly 433 mln. teńgeni qurady.
Degenmen naryqta halyqtyń lotereıalarǵa qatysýǵa senimin tómendetetin qarjylyq jáne quqyqtyq tártip buzýshylyqtar oryn alǵan. Mundaı zańdy buzýshylyqtyń bolǵany Bas prokýratýranyń málimetterimen de rastalǵan. Osy rette, atalǵan salany zańnamalyq retteý qajet.
Soǵan oraı osy zań jobasy lotereıalardy uıymdastyrý men ótkizýdiń qazirgi ýaqytqa saı quqyqtyq, ekonomıkalyq jáne áleýmettik negizderin zańnamalyq deńgeıde anyqtaý maqsatynda ázirlengen.
Bastamashylardyń aıtýynsha, zań jobasyn qabyldaý osy saladaǵy kásipkerlik qyzmettiń damýyna oń áser etetin memlekettik retteýdiń jáne baqylaýdyń jańa júıesin engizýge múmkindik beredi. Eń bastysy, kúmándi lotereıalardy uıymdastyrýdy shekteýge jáne halyqtyń lotereıa oıyndaryna degen senimin arttyrýǵa yqpal etedi. Buǵan qosa, zań jobasynyń aıtarlyqtaı mańyzdy elementi lotereıany ótkizýdiń áleýmettik mańyzdylyǵyn engizý bolyp tabylady. Sonyń nátıjesinde ulttyq lotereıa operatorynyń ınstıtýtyn engizý usynylady, ony Qazaqstan Úkimeti aıqyndaıtyn bolady.
