Kúmándi memlekettik satyp alýlar qalaı tekseriledi

ASTANA. KAZINFORM – Qarjy vıtse-mınıstri Daýren Keńbeıl Ortalyq kommýnıkatsııalar qyzmeti alańynda ótken brıfıngide BAQ-ta jarııalanatyn kúmándi memlekettik satyp alýlarǵa mınıstrlik tarapynan qalaı mán beriletinine qatysty túsinik berdi.

Brıfıng barysynda jýrnalıster BAQ-ta jarııalanǵan kúmándi satyp alýlarǵa taldaý jasala ma degen saýal qoıdy. Atap aıtqanda, byltyr Qorǵanys mınıstrliginiń áskerı bólimderi sývenırler satyp alǵany, sondaı-aq birqatar ákimdikterdiń qymbat avtokólikter alýǵa tapsyrys jarııalaǵany jónindegi aqparattar mysalǵa keltirildi.

– Mınıstrlik BAQ-ta shyqqan osyndaı kúmándi memlekettik satyp alýlarǵa mindetti túrde mán beredi. Sonymen qatar Memlekettik ishki aýdıt komıteti árbir kúmándi satyp alýǵa tekserý júrgizip, óz qorytyndysyn shyǵarady. Eger satyp alý shynymen zańsyz dep tanylsa, komıtet óz tetikteri arqyly oǵan tosqaýyl qoıa alady, – dedi vıtse-mınıstr.

Onyń aıtýynsha, kúmándi satyp alý deregi anyqtalǵan jaǵdaıda Memlekettik ishki aýdıt komıteti satyp alý rásimin zerdeleıdi. Tekserý qorytyndysy boıynsha zań aıasynda shartty qaıtaryp alý, toqtatý nemese talaptaryn ózgertý týraly nusqama beriledi. Bul nusqamalar memlekettik organdar úshin mindetti bolyp sanalady.

– Eger berilgen nusqama 5 jumys kúni ishinde oryndalmasa, Memlekettik ishki aýdıt komıteti den qoıý sharalaryn qoldanady. Ol Ákimshilik quqyqbuzýshylyq týraly kodekstiń 207-babynda kózdelgen tórt negizdeme boıynsha aıyppul salýǵa múmkindik beredi, – dep tolyqtyrdy Daýren Keńbeıl.

Aıta keteıik, artyq shyǵyndardy azaıtý úshin memlekettik satyp alý erejeleri ózgertildi.