Quman Tastanbekovty 20 jeltoqsanda aqtyq saparǵa shyǵaryp salady

«Quman Tastanbekovpen qoshtasý rəsimi 20 jeltoqsan kúni tańǵy 10-da akterdiń 1968 jyldan beri qyzmet etken orny - M.Əýezov atyndaǵy qazaq akademııalyq drama teatrynda ótedi", - delingen basqarma habarlamasynda.

Tanymal qazaqstandyq akter Quman Tastanbekov 72 jasynda Aqtaý qalasynda dúnıe saldy. Akter Mańǵystaý oblysyndaǵy týystaryna qonaqqa barǵan.

Jeksenbi kúni 17 jeltoqsanda Quman Tastanbekovtyń məıiti Aqtaýdan Almatyǵa ushaqpen jiberildi. Marqumnyń máıitin shyǵaryp salýǵa Mańǵystaý oblysynyń ákimi Eraly Toǵjanov pen jergilikti zııaly qaýym ókilderi jáne qala turǵyndary áýejaıǵa jınaldy.

 Əýejaıda Mańǵystaý oblysynyń əkimi Eraly Luqpanuly marqumnyń ómirlik jary Merýert Qarataıqyzyna, balalary men aǵaıyn-baýyrlaryna jáne akterdiń ónerin qasterlep, azamattyq tulǵasyn qadir tutqan barsha qaýymǵa Mańǵystaý jurtshylyǵynyń atynan kóńil aıtty.

Eske sala keteıik , búgin Memleket basshysy Nursultan Nazarbaev kórnekti teatr jáne kıno akteri, Qazaqstannyń halyq ártisi Quman Tastanbekovtiń qaıtys bolýyna baılanysty týystary men jaqyndaryna kóńil aıtý jedelhatyn joldady. 

Jedelhatta Q.Tastanbekovtiń otandyq teatr jáne kıno ónerin damytýǵa, sondaı-aq jas urpaqty tárbıeleýge qosqan zor úlesi atap kórsetilgen.

«Onyń jarqyn beınesi men ult ónerine sińirgen eńbegi halyq jadynda árqashan saqtalatynyna senimdimin», - delingen jedelhatta.

 Quman Tastanbekov 1945 jyly burynǵy Taldyqorǵan oblysynda dúnıege kelgen. Qazaqstannyń Halyq ártisi, Qazaqstan Lenındik komsomol syılyǵynyń laýreaty, «Qurmet», «Parasat» ordenderiniń ıegeri.

1969 jyly Qazaq Memlekettik Qurmanǵazy atyndaǵy konservatorııanyń teatr fakýltetin bitirgen.

Ol sahnada O. Bókeevtiń «Qulynym menińdegi» - Jan, «Vetnam juldyzyndaǵy» - Ushqysh, Á. Nurpeıisovtiń «Qan men terinde» - Táńirbergen, Ǵ. Músirepovtiń «Aqan seri-Aqtoqtysynda» - Aqan, S. Muqanovtyń «Shoqan Ýálıhanovyndaǵy» - Shoqan, T. Ahtanovtyń «Antynda» - Saýran, M. Áýezovtiń «Aıman-Sholpanynda» - Álibek, T. Ahtanovtyń «Joǵalǵan dosynda» - Estemesov, Sh. Aıtmatovtyń «Ana-Jer-anasynda» - Qasym, «Aq kemesinde» - Qulbek, E. Dombaevtyń «Bizdiń klastyń qyzdarynda» - Tólegen, B. Muqaıdyń «Ómirzaıasynda» - Tsezar, F.Erveniń «Túlki bıkeshinde» - Florıdor, N. Hıkmettiń «Farhad-Shyrynynda» - Farhad syndy negizgi rólderdi somdady.

Teatr repertýarynda júrip jatqan spektaklderde - Shahımardenniń «Tomırısinde» - Balqash, S. Toraıǵyrovtyń «Qamar sulýynda» - Omar, S. Muqanovtyń «Móldir mahabbatynda» - Jaqypbek, T. Nurmaǵanbetovtiń «Eski úımen qoshtasýynda» - Jalǵasbek, B. Jákıevtiń «Júreıik júrek aýyrtpaıynda» - Qarııa, M. Zadornovtyń «Kúıeýińizdi satyńyzshy» komedııasynda - Andreı, G. Gaýptmannyń «Ymyrttaǵy mahabbatynda» - Shteınıts, Shekspırdiń «Romeo men Djýlettasynda» - Montekkı, D. Kobýrnnyń (aýd. E. Amanshaev) «Jynoınaǵynda» - Veller Martın (rej. E.A manshaev, A. Kákisheva), A. Chehovtyń «Apaly-sińlili úsheý» dramasynda (aýd. Á. Bópejanova, rej. R. Andrıasıan, A. Kákisheva) - Kýlygın rólderin somdaǵan.

Q. Tastanbekovtiń kıno óneri salasyndaǵy eńbegi de eleýli. Ol ataqty «Qyz Jibek» fılmindegi (rejısser S. Qojyqov, stsenarıı Ǵ. Músirepov, redaktor A. Súleımenov, 1970 j.) Tólegen rólimen «juldyzy janǵan» akter. Budan keıin de kóptegen fılmge - «Bizdiń Ǵanı»» (1971), «Munda aqqýlar ushyp keledi» (1973), «Aqqýlar jańǵyryǵy» (1974), «Qosymsha saýaldar» (1978), «Aǵamnyń qalyńdyǵy» (1979), «Provıntsıaldy roman» (1981), «Qarasha qazdar qaıtqanda» (1981), «Órnek» (1982), «Alań jıeginde» (1982), «Kimsiń sen, salt atty?» (1987),«Adam-jel» (2003), «Mahambet» (2008) t.b. túsken.