Qum kenishinde qaraqshylyq shabýyl jasaǵan kúdikti ustaldy
KÓKShETAÝ. QazAqparat – Aqmola oblysynda qum kenishinde qaraqshylyq shabýyl jasaǵan kúdikti qylmystyń izi sýymaı ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, oqıǵa maýsymnyń 12-inde saǵat 15:00-de Tselınograd aýdanynda oryn aldy. Jergilikti polıtsııa bólimine Qaramendi batyr aýyly aýmaǵyndaǵy qum kenishinde belgisiz er adamnyń tegis uńǵymaly qarýmen aqsha, uıaly telefondy ıemdenip, «KamAZ» júk kóligin minip ketkendigi týraly telefon arqyly habar tústi. Qaskóı betin masadan qorǵanýǵa arnalǵan setkamen tumshalaǵan.
«Kúdiktini ustaý úshin jeti aýmaqtyq bólimniń patrýldik polıtsııa qyzmetkerleri jumyldyryldy. Tártip saqshylarynyń aldynda eń birinshi kezekte kólik júrgizýshisiniń qaskóıdiń qolynan zardap shegýine jol bermeý boldy», - deıdi vedomstvodan.
Jedel qolǵa túsirý sharasy barysynda Tastaq aýylynyń mańyndaǵy orman alqabynda kúdikti ustaldy. Júrgizýshisi zardap shekken joq.
«Qazirgi kezde osy oqıǵaǵa baılanysty QR QK 192 babynyń 2 bóligi 4 bólimshesi «qaraqshylyq» boıynsha sotqa deıingi is qozǵaldy. Sonymen birge, QR QK 125 babynyń 1 bóligi «adam urlaý» boıynsha is qozǵaldy. Kúdikti ýaqytsha ustaý oqshaýlaǵyshyna qamaldy», - dep tolyqtyrdy vedomstvodan.
