Qulja tasjolyndaǵy janjal: Almatyda 20 jastaǵy jigit júrgizýshini tapanshamen qorqytqan
ALMATY. KAZINFORM — Almatyda júrgizýshiden travmatıkalyq tapansha tárkilendi.
Almaty polıtsııasynyń málimdeýinshe, jol ústindegi janjalǵa baılanysty polıtsııaǵa habar tústi. Qulja tasjolynda kólik júrgizýshisi basqa avtokólik júrgizýshisiniń tapanshaǵa uqsas zat kórsetkenin habarlaǵan.
Aqparat dereý Medeý aýdandyq polıtsııa basqarmasynyń patrýldik polıtsııa qyzmetkerlerine berildi. Tarasov kóshesimen qıylysta polıtseıler izdestirilip jatqan avtokólikti toqtatty. Rólde 20 jastaǵy jigit otyrǵan.
Avtokólikti tekserý kezinde jedel-tergeý toby travmatıkalyq tapanshany taýyp, tárkiledi.
— Qazir qarýdyń jigitke qaıdan kelgeni jáne ony kólikte qandaı maqsatpen alyp júrgeni anyqtalyp jatyr. Oqıǵanyń ózge de mán-jaılary tekserý barysynda belgili bolady, — dep málimdedi Almaty PD.
Eske salaıyq, Astanada túngi janjalda gaz tapanshasyn qoldanǵan er adamǵa úkim shyqqan edi.
