Qulja tas jolyndaǵy burylystardyń birinde kólik qozǵalysy shekteledi

Almatyda ınjenerlik jelilerdi qaıta qurý jumystaryna baılanysty Qulja tas jolynyń boıyndaǵy №8 burylysta kólik qozǵalysy eki aptaǵa jýyq ýaqytqa jabylady, dep habarlaıdy  Kazinform. 

Almaty ákimdiginiń málimetinshe, «Buqtyrma kóshesi men Qulja tas joly qıylysyndaǵy jolaıryq qurylysy» jobasy aıasynda ınjenerlik jelilerdi qaıta qurý jumystarynyń júrgizilýine baılanysty 25 qazan saǵat 23:00-den 7 qarasha saǵat 18:00-ge deıin Qulja tas jolyndaǵy №8 burylysta kólik qozǵalysy tolyǵymen shekteledi. 

«Jabyq jol bóligin Alataý trassasy boıynsha Gúldala aýylyna shyǵyp, Rysqulov dańǵyly men Qulja tas joly qıylysyndaǵy jolaıryqtan burylyp Gúldala aýylyna qaraı shyǵatyn estakada arqyly aınalyp ótýge bolady», - dep habarlady ákimdikten. 

Búginde osy joba aıasynda Qulja traktisi boıynsha estakadanyń aralyq qurylysyn, Buqtyrma kóshesindegi tonnel bólikti, sezder men túıispelerdi salý boıynsha jumystar aıaqtaldy, al bul kólik torabynyń ótkizý qabiletin bes esege arttyrady.