Qulja tasjoly alty jolaqqa deıin keńeıtilmek
ALMATY. KAZINFORM - Almatyda Qulja tasjoly alty jolaqqa deıin keńeıtilmek. Bul atalǵan ýchaskeniń ótkizý qabiletin 2 esege arttyrady.
«Almatyda 4 maýsymda Rysqulov dańǵylynan Buqtyrma kóshesine deıin Qulja tas jolyn qaıta jańartý bastalady. Bul jumys aıasynda joldy 4 jolaqtan 6 jolaqqa deıin keńeıtý josparlanǵan, bul ýchaskeniń ótkizý qabiletin eki esege arttyrýǵa múmkindik beredi», - dep atap ótti qalalyq ákimdikten.
Jalpy, uzyndyǵy 2,3 shaqyrym joldy qaıta jańartý kózdelgen. Jol boıyn keńeıtý arqyly ár baǵytta 3 jolaq salynady. Bul shara aýmaqtyń ótkizý qabiletin táýligine 40 myń avtokólikten 80 myńǵa deıin arttyrady.
Sonymen qatar, jol jıegine tosqaýyl qorshaýyn, jol boıyn jaryqtandyrý jáne sý burý tirekterin ornatý josparda. Jaıaý júrginshilerdiń qaýipsizdigin qamtamasyz etý úshin eki jaǵynan eni 2-den 3 metrge deıingi trotýar jabdyqtalady.
«Jol boıyn qaıta jańartý jumystary úsh kezeńge bólingen. Birinshi kezeńde joldyń batys jaǵy, ekinshisi ortalyq bóligi, úshinshisi shyǵys jaǵynda jumys isteledi. Biraq árbir kezeńde eki baǵytta da qozǵalys shektelmeıdi. Árbir ýchaskedegi jumystyń uzaqtyǵy shamamen bir aıǵa sozylady. Jol boıynyń búkil eni boıynsha joldy tańbalaý jáne belgiler ornatý arqyly qozǵalysty osy jyldyń 25 tamyzyna deıin ashý josparlanǵan», - dep habarlady ákimdikten.
Byltyr Buqtyrma kóshesi men Qulja tas jolynyń qıylysyndaǵy jolaıyryqta, dálirek aıtqanda, Buqtyrma kóshesi boıynda 4 jolaqty avtotýnnel ashylǵan bolatyn.
Sondaı-aq bıyl Seıfýllın dańǵyly men Jansúgirov kóshesiniń qıylysynda jolaıryqty ashý josparda.
Joba aıasynda Seıfýllın dańǵylynda kólikterdiń kedergisiz júrýi úshin jalpy uzyndyǵy 690 metr bolatyn eki túnel salý kózdelgen. Jansúgirov kóshesinde 4 jer ústi jaıaý júrginshiler ótkeli salynyp, trotýarlar jáne kógaldandyrý qarastyrylǵan.
