«Kúltegin» anımatsııalyq fılminiń treıleri jarııalandy
ASTANA. QazAqparat - Sh.Aımanov atyndaǵy «Qazaqfılm» kınostýdııasy «Kúltegin» tolyqmetrajdy anımatsııalyq fılminiń treılerin jarııalady, dep habarlaıdy QazAqparat tilshisi.
QR Mádenıet jáne sport mınıstrliginiń tapsyrysy boıynsha jaryqqa shyqqan bul týyndy jalpyulttyq prokatqa qarashanyń 22-nen bastap jas kórermenderge jol tartady.
Jas rejısser-anımator Adaı Ábildanyń qolynan shyqqan atalmysh tarıhı anımatsııalyq týyndy kóshpendi halyqtardyń basyn biriktirip, Uly kóshpendilerdiń dástúrin jalǵastyrǵan túrik qaǵanatynyń dańqty áskerı qolbasshysy Kúlteginniń jastyq shaǵy týraly baıandaıdy.
««Kúltegin» fılmi ata-babalarymyzdyń janqııarlyq erligi, birligi men aýyzbirshiligi týraly. Kúltegin- bul tutas bir dáýirdiń tarıhı tulǵasy. Sondyqtan da bizdiń basty maqsatymyz - sol kezdegi mádenıetti ashyp kórsetý ǵana emes, sonymen qatar mýltıplıkatsııa arqyly jas kórermenderimizdiń tarıhqa degen qyzyǵýshylyǵyn arttyrý, - dedi Adaı Ábilda.
Jas urpaqty meıirimdi, qaıyrymdy bolýǵa, sonymen qatar Otandy súıýge tárbıeleýdi aldyna maqsat qoıǵan rejısser Adaı Ábildanyń osyǵan deıin de túsirgen qysqametrajdy fılmderi kóptegen Halyqaralyq festıvalderde kórsetilip, júldeli oryndardan kóringen.
«Ókinishke qaraı, búginde otandyq telearnalar negizinen balalarymyzǵa teris tárbıe beretin sheteldiń mýltfılmderin kórsetip júr. Sońǵy kezderi balalardy meıirimdilikke shaqyratyn mýltfılmder joqtyń qasy. Ol fılmderde ádemi ashyq boıaýlar da, jarylystar da, qyzyqty keıipkerler de bar, biraq eń bastysy - mán-maǵynasy joq. Bundaı úrdisti toqtatý qajet. Ózimizdi ulttyq keıipkerlerimiz kerek, - dedi rejısser.
«Kúltegin» anımatsııalyq fılminiń treılerin myna siltemeden kórýge bolady.
