«Kúlshe-qyz» ertegisi 65 jyldan keıin qazaq tiline aýdaryldy
ASTANA. QazAqparat - «Qazaqstan» Respýblıkalyq teleradıokorporatsııasynyń (RTRK) dýblıaj stýdııalarynda «Walt Disney» kompanııasynyń eleýli shyǵarmasy boıynsha júrgizilgen jumys sońyna jetti, dep habarlady Ulttyq arnanyń baspasóz qyzmetinen. Álemniń anımatsııalyq klassıkasy «Cinderella» (Kúlshe-qyz, AQSh, 1950 jyl) «Qazaqstan» teleradıokorporatsııasynyń mýltfılm dýblıajy boıynsha eń iri joba bolyp otyr.
«Disney» anımatsııalyq fılmniń «Kúlshe-qyz» ertegisi - kınematografııa tarıhyndaǵy iri fılmderdiń biri. Onyń jasalýyna Ýolt Dısneı ózi qatysqan. Búgingi kúni «Disney» kompanııasy men «Qazaqstan» Respýblıkalyq teleradıokorporatsııasy yntymaqtastyǵynyń arqasynda qazaqstandyq kórermender osynaý tamasha anımatsııalyq fılmdi qazaq tilinde kóre alady», - dedi «Ýolt Dısneı Kompanı SNG» AAQ bas dırektory Marına Jıgalova-Ozkan.
13 keıipker jáne olardyń beınesindegi qazaqstandyq akterlar boıjetkenniń basynan ótken sezimge toly, ádemi hıkaıasyn baıandaıdy. Aıta ketetin jaıt, túpnusqada 9 akter bolsa, olardyń ekeýi keıipker-adamdardy sóıletip qana qoımaı, sonymen qatar 2 tyshqandy da sóıletti. «Kúlshe-qyz» kóp jobalardyń biri bolyp qana qoımaı, «Qazaqstan» Korporatsııasynyń kınokórsetilim jáne dýblıaj bóliminiń jumys tobyna berilgen zor múmkindik boldy. «Kúlshe-qyz» mýzykalyq mýltfılm. Kóptegen ádemi kompozıtsııalarǵa toly, olardy tıisti túrde oryndaý mindeti bizge júkteldi. Sondyqtan Astana qalasy ákimdiginiń memlekettik fılarmonııasynyń kameralyq horyn qatystyrdyq», - dedi «Qazaqstan» RTRK kınokórsetilim jáne dýblıaj bóliminiń bastyǵy Gúlnár Rahımova. Kórkemdik jetekshi jáne dırıjer Gúlmıra Quttybadamovanyń bastamasymen ujym tórt kompozıtsııany oryndady. Atap ótetin mańyzdy jaıttardyń biri, «Qazaqstan» arnasynyń ujymy TMD aýmaǵynda birinshi bolyp, «Kúlshe-qyz» ertegisiniń dýblıajyna kásibı hordy qatystyrdy. «Kúlshe-qyz» mýltfılmi hormen Máskeýde de dybystalmaǵan. Sol kúıi aǵylshyn hory paıdalanylǵan», - deıdi dýblıaj rejısseri Rıta Ábisheva. «Kúlshe-qyz» anımatsııalyq fılmmen jumys jasaý tek «Qazaqstan» RTRK ujymy úshin ǵana emes, bul úderistiń barlyq qatysýshylaryn eleń etkizgen iri oqıǵa boldy. «Kúlshe-qyz» ertegisi kóptegen tanymal akterlerdiń basyn biriktirdi. Qyzyqty tarıhtyń keıipkerlerin Aınur Bermuhambetova, Danııar Svanqulov, Gúljan Ábdibaeva dybystady. Teatr jáne kıno aktrısasy, QR Eńbek sińirgen qaıratkeri Leıla Hanınga-Beknazar alǵash ret ózin epızodtyq róldegi dýblıajda synap kórdi. 8-naýryz kúni «The Walt Disney Company» mýltımedııalyq ımperııanyń klassıkalyq shyǵarmasy qazaq tilinde «Qazaqstan» telearnasynyń efırinde saǵat 16.45-te kórsetiledi. 9-naýryz kúni saǵat 13.10-de qaıtalaýy kórsetiledi. «Qazaqstan» RTRK jáne «Walt Disney» kompanııasynyń yntymaqtastyǵy 2012 jyly bastaldy. Budan buryn ulttyq telearnanyń efırinen «Tachkı 2», «Monstrlar ýnıversıteti», «Nemony izdeý» mýltfılmderi qazaq tilinde kórsetildi.
