Qulsaryny sýmen qamtamasyz etetin jańa sý taratqysh salynady - Atyraý oblysy

Atyraý oblysynyń óńirlik kommýnıkatsııalar qyzmetiniń habarlaýynsha, qarqyndy damý áleýeti joǵary aýdanda 2018 jyly kóp jumystar atqaryldy. Ótken jyly aýdanda 31,5 mln tonna munaı, 15,8 mlrd tekshe metr gaz óndirildi.

Aýdan ákimi Azamat Bekettiń aıtýynsha, qurylys salasyna 444 mlrd teńge ınvestıtsııa salyndy. Qulsarynyń jańa yqsham aýdandaryna ınfraqurylym júrgizýge erekshe kóńil bólinip otyr. «Bereke», «Murager» yqsham aýdandarynda eki balabaqsha, mýzeı men kitaphana, óner mektebine jańa ǵımarattardyń qurylysy bastalǵan bolatyn.

Jol qurylysy jumystary úsh kezeńge bólingen. Qulsaryǵa 107 km jol salý kerek. Birinshi kezeń boıynsha jumystar bastalyp 5,7 shaqyrym jolǵa asfalt tóseldi. Birinshi kezeń boıynsha qalanyń 14 yqsham aýdanyn qamtıtyn 45 shaqyrym avtojol salý jumystary osy jyly da jalǵasady.

Qursaı ózeniniń túbin tereńdetý jáne jaǵalaýyn bekitý jumystary júrip jatyr. Ótken jyly aýdanda 5 myńǵa jýyq jańa jumys orny ashylǵan.

Aýdan ákimi bilim berý, densaýlyq saqtaý nysandarynda kásibı kadrlar jetispeıtinin atap ótti. Aýdanǵa 31 muǵalim, eki dáriger (okýlıst jáne kardıolog) kerek. Bul problemany sheshý úshin bilim berý, densaýlyq saqtaý basqarmalarymen birlesken jumystar júrgizilýde.

Aýdan ákimi Azamat Beket 2019 jyldyń basty josparlaryn aıtty. Jańa avtojol qurylysy jalǵasady, turǵyn úıler qurylysyna, baǵdarshamdar men beınebaqylaý kameralaryn satyp alyp, ornatýǵa qarajat qaralǵan. Jalpy uzyndyǵy 68 km kósheni jaryqtandyrý, qoǵamdyq kóliktiń úzilissiz júrýi úshin qosymsha 20 avtobýs satyp alý josparlanyp otyr.

Jylyoı aýdany ákiminiń esep berý jıynyn qorytyndylaǵan Nurlan Noǵaev aldymen aýdannyń damýyna toqtaldy.

«Ótken jyl óńir úshin tabysty boldy, birqatar jumystar atqaryldy. Aýdannyń, jalpy elimizdiń damýy barlyq qazaqstandyqtardyń ortaq tabysy, Memleket basshysynyń eldiń ishindegi jáne halyqaralyq arenadaǵy sarabdal saıasatynyń jemisi»,-dedi Nurlan Noǵaev.

Aımaq basshysy Úkimettiń oblysqa bergen barlyq tapsyrmalary tolyq kólemde oryndalǵanyn atap ótti. Muny aımaqtyń áleýmettik-ekonomıkalyq damý kórsetkishterinen de baıqaýǵa bolady. Ótken jyly naqty qandaı jumystar jasalǵanyn oblys ákimi 20 aqpanda halyq aldyndaǵy esep berý kezdesýinde aıtady.

«Jylyoı aýdany turaqty damyp keledi. Bul barlyq jylyoılyqtardyń eńbegi. Aýdanda kóp jyldar boıy sheshimin tappaı kelgen jumystar atqaryldy. Mysaly, Qursaı ózeniniń túbin tereńdetý jáne jaǵalaýyn bekitý, áleýmettik mańyzy bar jańa nysandar salý, turǵyndardyń áleýmettik ahýaldaryn ońaltý»,-dedi Nurlan Noǵaev.

Oblys ákimi kezdesýge kelgen turǵyndardyń qoıǵan saýaldaryna jaýap berdi. Aýdan turǵyndary avtojoldardy jóndeý, beınebaqylaý kameralaryn ornatý, ekologııanyń jaǵdaıy, turǵyn úı, áleýmettik nysandar qurylysy, turǵyn úı-kommýnaldyq sharýashalyq máseleleri jaıly surady. Jylyoılyqtardy aýyz sýmen qamtý máselesi de tolǵandyrady. Bılik aldynda aımaqty sýmen qamtý boıynsha strategııalyq mindet tur. Osyǵan baılanysty uzyndyǵy 30 km jańa sý taratqysh qurylysyn salý jóninde sheshim qabyldandy. Qubyr jelisi qoldanystaǵy «Qıǵash-Jańaózen» sý qubyryna qosylatyn bolady.

Turǵyndar Atyraý-Qulsary áýe baǵyty ashylýy múmkin be dep te surady. Oblys ákimi qazir avıakompanııalar aldynda el ishinde turaqty reısterdi qamtamasyz etý mindeti turǵanyn atap ótti. Bolashaqta olardy jergilikti, oblys ishindegi marshrýttar da qyzyqtyrýy múmkin. Jalpy aımaq basshysy aýdan ákimi Azamat Bekettiń jumysyn oń baǵalap, aýdan damýy boıynsha naqty tapsyrmalar berdi.