Qulsaryda «Dostyq» mádenı jáne demalys saıabaǵy ashyldy
ASTANA. QazAqparat - Búgin Qulsary qalasynda «Dostyq» mádenı jáne demalys saıabaǵynyń ashylý saltanaty ótti, dep habarlady Teńizshevroıl kompanııasynyń baspasóz qyzmetinen.
Saltanatty sharada Jylyoı aýdanynyń ákimi M. Іzbasov sóz alyp, Qulsary qalasy úshin mańyzdy jobany júzege asyrǵany úshin «Teńizshevroıl» JShS-ne alǵysyn bildirdi.
«Byltyr biz alǵashqy kóshetterdi otyrǵyzý saltanatyna qatysqan edik. Búgin, mine, barlyq kóshetterdiń ósip ketkenine kóz jetkizip otyrmyz. TShO-nyń Qulsary qalasyn kógaldandyrý jobasy QR Prezıdenti Nursultan Nazarbaevtyń elimizdi kógaldandyrý jónindegi bastamasyn qoldaý negizinde júzege asýda», - dep atap ótti óz sózinde TShO-nyń bas dırektory Tım Mıller.
TShO «Dostyq» saıabaǵyndaǵy 786 kóshetti qosa alǵanda, Qulsary qalasynyń túrli ýchaskelerinde barlyǵy 2000 aǵash otyrǵyzdy. Mádenıet jáne demalys saıabaǵyn abattandyrý TShO-nyń «Igilik» erikti áleýmettik-ınfraqurylym baǵdarlamasynyń bıýdjeti esebinen júzege asty. Saıabaq qulsarylyqtar men onyń qonaqtary úshin tamasha demalys ornyna aınalady.
Bul shara TShO bastamasymen jergilikti turǵyndardyń ıgiligine baǵyttalǵan «Jylyoı aýdanyn kógaldandyrý múmkindikterin zertteý» atty keń kólemdi tabıǵatty qorǵaý jobasynyń bir bóligi retinde uıymdastyrylǵan joba. Ol kóshetterdi otyrǵyzýdyń ilki jobasy retinde bastalǵan bolatyn. Mamandar aǵash kóshetteriniń jer qyrtysynyń tuzdy jáne ystyq klımat jaǵdaıynda ósýin arttyrý múmkindikterin egjeı-tegjeıli zerttegen edi.
