Qulsaryda bir top jasóspirim tún ortasynda shý shyǵarǵan
QULSARY. QazAqparat – Atyraý oblysynyń Qulsary qalasynda bir top jasóspirim tún ortasynda shý shyǵarǵan, dep habarlaıdy QazAqparat.
Oblystyq polıtsııa departamenti baspasóz qyzmetiniń aqparatyna qaraǵanda, bul týraly 20 mamyr saǵat 23:40 shamasynda Jylyoı aýdandyq polıtsııa bóliminiń kezekshi bólimine habar túsken.
«Bir top jasóspirim Qulsary qalasyndaǵy Mahambet dańǵylynda ornalasqan «Iranbaq» dámhanasynyń aldynda ózara daýlasyp, shý shyǵarǵan. Osyǵan baılanysty jedel-tergeý toby kórsetilgen orynnan kámeletke tolmaǵan jasóspirimderdi anyqtap, polıtsııa bólimshesine jetkizdi. Olardyń túngi ýaqytta zańdy ókilderinsiz turǵyn úıden tys jerde júrgeni úshin ata-analaryna qatysty ákimshilik hattamalar toltyryldy» dep habarlady departamenttiń baspasóz qyzmeti.
Qazir Jylyoı aýdandyq polıtsııa bólimi atalǵan qylmystyq quqyq buzýshylyq deregin jan-jaqty, tolyq ári obektıvti zertteý úshin Qylmystyq Kodekstiń 293-babymen (Buzaqylyq) sotqa deıingi tergeý júrgizip jatyr.
Eske sala ketelik, buǵan deıin Teńiz kenishinde aıaldamaǵa qaldyrylǵan sómke kúdik týdyrǵanyn habarlaǵan bolatynbyz.
