Qulsary stansasynan poıyzǵa adam otyrǵyzýǵa jáne túsirýge tyıym salyndy

QULSARY. QazAqparat - Atyraý oblysynyń Qulsary stansasynda jolaýshylardy poıyzǵa otyrǵyzýǵa jáne túsirýge tyıym salyndy, dep habarlaıdy QazAqparat «Qazaqstan temir joly» UK» AQ baspasóz qyzmetine silteme jasap.

Jylyoı aýdany bas memlekettik sanıtar dárigeriniń sheshimine sáıkes, koronavırýs ınfektsııasynyń taralýyna jol bermeý maqsatynda 2 shilde saǵat 07-00-den 15 shildege deıin Qulsary stansasynda poıyzǵa bılet satýǵa, otyrǵyzyp, túsirýge ýaqytsha tyıym salynǵan.

Atap aıtqanda, shekteý sharalary myna poıyzdarda qoldanylady:

- № 37/38 «Mańǵystaý-Nur-Sultan-Nurly jol»;

- № 309/310 «Mańǵystaý-Aqtóbe»;

- № 313/314 «Atyraý-Mańǵystaý»;

- №77/ 78 jáne № 313/314 jolaýshylar poıyzynyń quramynda qatynaıtyn «Almaty-2-Qulsary» tikeleı qatynaıtyn vagondary.

Qulsary stansasynan poıyzǵa otyrǵyzý jáne túsirý jolaýshylarda dárigerlik-konsýltatıvtik komıssııanyń qorytyndysy nemese medıtsınalyq mekemeniń shaqyrý haty bolǵan jaǵdaıda ǵana ruqsat etiledi.

Budan buryn Qulsary stansasyna deıin nemese sol stansadan bılet alǵan jolaýshylar jol júrý qujatyn qaıtaryp, júrilmegen jol aıyrmashylyǵyn nemese bılet qunyn tolyq qaıtaryp ala alady.

«Koronavırýs pandemııasyna baılanysty ulttyq tasymaldaýshy jolaýshylardan sanıtarııalyq-epıdemıologııalyq talaptardy saqtap, ózimen birge jeke qorǵanysh quraldaryn alyp júrýin suraıdy» delingen habarlamada.