Qulsary qalasyndaǵy toptyq tóbeles: 23 adam ustaldy

ATYRAÝ. QazAqparat – Atyraýdyń Qulsary qalasynda toptyq tóbeleske qatysy bar degen kúdikpen 23 adam ustaldy. Onyń ishinde 8 jasóspirim bar, dep habarlaıdy QazAqparat tilshisi.

5 qyrkúıek kúni Jylyoı aýdanynyń ortalyǵy – Qulsary qalasynda jastar toptasyp tóbelesken. Bul týraly vıdeo áleýmettik jelide tarady.

«Taǵy da Qulsary. Jaý kelgendeı eldiń bereketin alyp júrgen jastar. Vıdeoǵa túsirip otyrǵan jastar kópqabatty úıdiń tóbesinde otyrǵan sııaqty. Bizdiń tártip saqshylar qaıda?», - dep jazba qaldyrdy áleýmettik jeli qoldanýshysy.

Qulsary qalasynda tóbelestiń bolǵanyn Atyraý oblystyq Polıtsııa departamentiniń baspasóz qyzmeti rastady.

«Keshe, 5 qyrkúıekte túngi saǵat 22:20 shamasynda Qulsary qalasyndaǵy kópqabatty úıdiń janynda bip top adamnyń tóbeleskeni anyqtaldy. Jergilikti polıtseılerdiń jedel áreketi nátıjesinde barlyq qatysýshy ustaldy. Aýdandyq polıtsııa bólimine tóbeleske qatysy bar 23 adam jetkizildi. Onyń ishinde 8 jasóspirim bar.

Tergeý bastaldy. Tóbelesten dene jaraqatyn alǵandar men aýrýhanaǵa jetkizilgen jábirlenýshiler joq», - dep málim etti departamenttiń baspasóz qyzmetinen.

Eske salaıyq, Qulsary qalasynda birer kún buryn ǵana tóbeles bolyp, úsh kúdikti qamaýǵa alynǵan bolatyn.Ol kezde 19-20 jastaǵy jigitter túngi saǵat 03:00 shamasynda jınalyp, tóbelesken edi.