Qulsary qalasynda sý tapshylyǵy máselesi sheshiledi

ATYRAÝ. QazAqparat - Jergilikti bılik Astrahan oblysyndaǵy sý toǵanynyń kólemin ulǵaıtý arqyly Jylyoı aýdany halqyn sýmen qamtý máselesin sheshýge nıetti, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.

Búgin Jylyoı aýdanynyń ákimi Álımuhammed Quttymuratuly men Qulsary qalasynyń ákimi Shákir Keıkın №1  yqshamaýdan turǵyndarynyń sý problemasymen tanysty. Aýdan men qalanyń birinshi basshylary 17-18, 19-20  nómirli úılerdiń joǵary qabattaryna shyǵyp,  turǵyndardyń shaǵymdaryn tyńdap,  keıbir turǵyndar sý joǵary qabatqa tek belgili bir ýaqytta ǵana kóteriletinin aıtty.

Aýdan basshysy bul másele oblys deńgeıinde birneshe ret kóterilgenin atap ótti. Sondaı-aq, turǵyndarmen kezdesken Álımuhammed Quttymuratuly Astrahan-Mańǵyshlaq sý qubyry kúrdeli jóndeýden ótip jatqanyna toqtaldy.

Ótken aptada «SSS-5»  jobasy aıasynda aıtylǵandaı,  Atyraý men Mańǵystaý oblystaryn sýmen qamtýdy Astrahan oblysyndaǵy sý toǵany arqyly kóbeıtý jumysy aıaqtalýda. Bul joba eki oblystyń sýmen qamtylý kólemin táýligine 94000  kýb metrden 110000-ǵa deıin joǵarylatady.

Osylaısha jaqyn arada Jylyoı aýdany turǵyndarynyń sý tapshylyǵy problemasy sheshimin tappaq.