Qulsary qalasynda sport kesheni bar 3 myń oryndyq stadıon ashyldy
Qazaq munaıynyń alǵashqy tamshysy alynǵan Jylyoı aýdanynyń ortalyǵy – Qulsaryǵa 2001 jyly aýdandyq mańyzdaǵy monoqala mártebesi berilgen. Sol jyldan beri Qulsary qalalyq ákimdigi jumys isteıdi.
Jylyoı aýdanynyń ákimi Jumabek Qarajanovtyń málimetine súıensek, aýdanda 6 balalar men jasóspirimder sport mektebi jumys isteıdi. Sport mektepterinde 2500-ge jýyq bala sport túrlerimen shuǵyldanady.
«Endi mine, Qulsary qalasynda jańa sport kesheni bar stadıon ashyldy. Bul stadıonnyń qurylysy 2020 jyly bastalǵan. Bul – aýmaǵy 4,7 myń sharshy metr bolatyn tolyqtaı jabdyqtalǵan sport kesheni. Stadıonnyń syıymdylyǵy 3 myń adamǵa eseptelgen. Oǵan qosymsha salynǵan sport kesheninde qysqy maýsymda matchtar men oıyndar ótkizýge arnalǵan jabyq stadıon men basseın bar», -deıdi Jumabek Qarajanov.
Sport kesheninde trenajer zaldary arnaıy sporttyq quraldarmen jabdyqtalǵan. Munda jyl boıy birneshe sport túrinen sabaq ótkizýge múmkindik bar. Sonyń nátıjesinde bir mezgilde 250 adam sportpen shuǵyldana alady.
«Qulsary qalasynda jańa stadıon arqyly buqaralyq sportty damytýǵa jol ashylyp otyr. Endi bizdiń aýdanymyzdan da álem, Azııa chempıondary shyǵatynyna senemiz», -deıdi taekvondodan Qazaqstannyń sport sheberi Nuraddın Joldasov.
Eske sala ketelik, buǵan deıin Atyraýda 900 oqýshyǵa arnalǵan ózgeshe mekteptiń qurylysy bastalǵanyn habarlaǵan bolatynbyz.
