Qulsary qalasynda elektrondy bılet júıesi engizildi

ATYRAÝ. QazAqparat – Atyraý oblysyndaǵy shaǵyn qala – Qulsarynyń qoǵamdyq kólikterinde elektrondy bılet júıesi engizildi, dep habarlaıdy QazAqparat.

Qalaishilik jolaýshy tasymalymen aınalysatyn «Batystehınvest» JShS-niń bas dırektory Áýez Ábilákimovtiń habarlaýynsha, endi qoǵamdyq kólik qyzmetin paıdalanǵan jolaýshy jolaqysyn elektrondy karta arqyly tóleı alady.

«Bul – jergilikti ákimdikpen arada jasalǵan kelisimshartqa sáıkes júzege asyrylǵan joba. Elektrondy kartany tórt sanatqa bóldik. ıAǵnı, biryńǵaı, jeńildikti, áleýmettik jáne oqýshyǵa arnalǵan túrleri bar. Jeńildikti túrin jolaqyny 50 paıyz mólsherinde tóleıtin zeınetkerler paıdalanady. Avtobýsta tegin júrýge quqyǵy bar múgedekter men «Altyn alqa» ıeleri áleýmettik kartany qoldanady. Al, mektep jasyndaǵy balalarǵa oqýshylarǵa arnalǵan túri usynylyp otyr», - deıdi «Batystehınvest» JShS-niń bas dırektory Áýez Ábilákimov.

Qulsary qalasynyń turǵyndary atalǵan seriktestik ıeligindegi qoǵamdyq kólik qozǵalysyn Qulsary Bus qosymshasy arqyly baqylaı alady.

Avtor: Joldasbek Kósherbaıuly