Qulsarynyń turǵyndary sý bógetiniń qorshaýyn kúsheıtip jatyr
ATYRAÝ. KAZINFORM – Sý tasqynynan keıingi alǵashqy tańda turǵyndar jergilikti bılik organdarymen birge bógetterdiń qorshaýyn kúsheıtip, qum toly qap tósep, óz úılerin tasqynnyń kelesi leginen saqtaýdyń bar amalyn jasap jatyr. Bul týraly Atyraý oblysy ákimdiginiń baspasóz qyzmeti málimdedi.
«Qalamyzdyń turǵyndaryn tolyqtaı evakýatsııalaý týraly jergilikti halyq arasynda túsinispeýshilik týyndady. Qazirgi ýaqytta tek sý basý qaýpi bar shaǵynaýdandardyń turǵyndary ǵana evakýatsııalanady. Búgin ákimdik Jem ózeniniń arnalaryn tazartýǵa aıtarlyqtaı kúsh saldy. Ol sý deńgeıiniń tómendeýine oń áserin tıgizedi. Men senimin joǵaltpaı, jaǵany bekitý jumystaryn jumyla jasap jatqan Qulsary halqyna alǵysymdy bildiremin! Jaǵdaıdyń qıyndyǵyna qaramastan, halyqty úreıge erik bermeýge shaqyramyn. Týyndaǵan keleńsizdikterdi meılinshe azaıtyp, súıikti qalamyzdyń ár turǵynynyń qaýipsizdigin qamtamasyz etýge barymyzdy salamyz» — dedi Jylyoı aýdanynyń ákimi Jumabek Qarajanov.
Óńirdegi sý jetpegen aımaqtardaǵy tasqyn sýdan qorǵaný jumystary meıilinshe jalǵasyp jatyr.
«6 sáýirde túngi saǵat 02.00-den bastap Teńiz ken ornynyń vahtalyq qalashyqtaryna Qulsary qalasynan evakýatsııalanǵan turǵyndar, onyń ishinde basym kópshiligi — áıelder men balalar kele bastady. Olar ómir súrýge qajettiniń bárimen qamtamasyz etilgen. Qazirgi ýaqytta TShO barlyq evakýatsııalanǵandardy azyq-túlikpen jáne sýmen qamtamasyz etýge kúsh salyp otyr» — delingen habarlamada.
Eske sala keteıik, Jylyoı aýdanynda 4 sáýirde tasqyn sýdan tóngen qaýipke baılanysty tótenshe jaǵdaı jarııalandy. Artynsha Jylyoı aýdanynyń ortalyǵy – Qulsary qalasyna tasqyn sý kire bastady. Atyraý oblysynyń Jylyoı aýdanynda sý tasqyny bolýy múmkin aımaqta turatyn halyqty habardar etý úshin dabyl sırenasy qosylyp, turǵyndardy 10 evakýatsııalyq pýnktke kóshire bastady.
Beıneý aýdanynda irgeles kórshi oblysqa qarasty Qulsary qalasyndaǵy sý tasqynynan keıin jedel jeli iske qosyldy. Qulsary qalasynda 500 úıdi tasqyn sý basyp, 2400 adam kóshirildi.
Túnge qaraı Qulsaryda 2,5 myń ǵımarat sý astynda qalyp, myń bala evakýatsııalandy.
Sý basqan Qulsarydaǵy aýrýhanadan 77 naýqasty Mańǵystaý oblysyna aparady.
Búgin Memleket basshysy Qasym-Jomart Toqaev Atyraý oblysynyń ákimi Serik Shapkenovpen telefon arqyly sóılesip, oblystaǵy birde-bir otbasy memlekettiń nazarynan tys qalmaıtynyn aıtty. Prezıdent turǵyndarǵa sálem joldap, barynsha qoldaý kórsetiletinin jetkizdi.
