Qulsarynyń 606 turǵyny baspanasyn qalpyna keltirý úshin ótemaqy aldy

ATYRAÝ. KAZINFORM – Qulsary qalasynda tasqyn sýdan zardap shekken 606 turǵyn baspanasyn qalpyna keltirý úshin ótemaqyny aldy.

Atyraý oblysy jedel shtabynyń deregine súıensek, Qulsary qalasyndaǵy mobıldik toptar turǵyndarǵa 1667 úıdi baǵalaý jáne tehnıkalyq tekserýdiń qorytyndysyn tanystyrǵan. 

Baǵalaý qorytyndysyn alǵan 1164 turǵyn ótemaqy týraly kelisimshartqa qol qoıyp otyr. Onyń ishinde 606 turǵynǵa ótemaqy berilgen. 

Ótemaqy alý týraly kelisimshartqa qol qoıǵannyń biri Janargúl Artyǵalıevanyń úıi apatty dep tanylǵan. Soǵan baılanysty oǵan úıin tolyq buzý usynyldy.

«Eki komıssııanyń mamandary kelip, tehnıkalyq saraptama men baǵalaý júrgizdi. Sodan keıin mobıldik top baǵalaý qorytyndysymen tanystyrdy. Maǵan usynylǵan ótemaqy kólemimen kelistim. Sondyqtan, kelisimshart jasadyq», -deıdi Janargúl Artyǵalıeva.

Al, zeınetker Dabyl Ahmetov te búlingen múlkin baǵalaý nátıjesimen tanysqan. Ótemaqy alý úshin ákimdikpen kelisimshartqa qol qoıǵanyn aıtady. 

«Sý basqan úıimdi ádil baǵalandy. Endi bizdiń qalamyzda mundaı sý tasqyny bolmaıdy dep senemin», — deıdi Dabyl Ahmetov.

Eske sala ketelik, budan buryn Qulsary turǵyndaryna ólgen mal úshin 123,8 mln teńge ótemaqy tólengenin habardar etken edik.