Qulsarynyń 250 turǵynyna zalal kelgen múlki úshin ótemaqy beriledi
ATYRAÝ. KAZINFORM – Qulsary qalasynda sý tasqynynan zardap shekken turǵyndardyń turǵyn úıi men múlkin baǵalaý nátıjesimen tanystyrý jumystary jalǵasyp jatyr.
Mobıldi toptar kúsheıtilgen rejımde jumys istep jatyr.
«Úıdi aralaý barlyq baǵalaý jumystary tolyq aıaqtalǵanǵa deıin kún saıyn demalyssyz jalǵasatyn bolady. Búgingi tańda Qulsary qalasy boıynsha sý basqan turǵyn úı ıelerinen túsken 250 ótinim qaraldy», — delingen habarlamada.
Sonymen qatar, sý tasqyny kezinde zardap shekken turǵyndarmen aqshalaı ótemaqy tóleý boıynsha kelisimder jasasý boıynsha jumystar jergilikti Mádenıet úıinde júrgizilip jatyr.
Qulsary qalasynyń turǵyny Toıǵan Qarabaeva baǵalaý nátıjesinde kórsetilgen aqshalaı ótemaqy somasyn alýǵa kelisip otyr. Onyń úıi 5 sáýirde sý tasqyny kezinde qulap qalǵan bolatyn. Sharýashylyq ǵımarattar da zardap shekti.
— Men qazir Qulsarydaǵy shaǵyn aýdandarynyń birinde páter jaldap júrmin. Sondyqtan, tezirek baspana satyp alýym kerek. Aqshalaı ótemaqy alǵannan keıin jańadan úı salamyn nemese jańa úı satyp alýym da múmkin. Maǵan ótemaqy berip otyrǵan memleketke alǵys aıtamyn, — dedi Toıǵan Qarabaeva.
Zardap shekkenderdiń qatarynda Qulsary qalasynyń Atyraý shaǵyn aýdanynyń turǵyny Laýra Sandybaeva da bar. Onyń úıi 5 sáýirde sý astynda qalǵan bolatyn. Keıin aýlasy qurǵatylyp, úı mamandardyń baǵalaýynan ótti.
— Maǵan eki baǵalaý komıssııasy keldi. Qazir men olardyń jumysynyń nátıjelerin jáne sý basqan turǵyn úıimniń zalalyn jarııalaýdy kútip júrmin. Eger usynylǵan soma qajetimdi óteıtin deńgeıde bolsa, men aqshalaı ótemaqy alýǵa kelisim beremin, — dedi Laýra Sandybaeva.
Baǵalaý nátıjelerimen tanysqannan keıin eki kún ótken soń, Qulsary turǵyndary memleketten kómek alý úshin Jylyoı aýdanynyń ákimdigine júgine alady. Kelisim aıasynda turǵyndar zardap shekken turǵyn úı úshin ótemaqy optsııalaryn tańdaı alady.
