Qulsaryǵa azyq-túlik pen zattar avıatsııa arqyly jetkizilip jatyr
ASTANA. KAZINFORM – Qutqarýshylardyń, jergilikti atqarýshy organdar men volonterlerdiń birlesken jumysynyń nátıjesinde 80 myńnan astam turǵyny bar 135 eldi meken jáne 21 myńnan astam ǵımaratty sý basýǵa jol berilmedi. Bul týraly Tótenshe jaǵdaılar mınıstrligi Tótenshe jaǵdaılardy joıý departamentiniń bastyǵy Qaharman Orazalın málim etti.
«Memleket basshysynyń tapsyrmasymen Qostanaı, Batys Qazaqstan, Aqmola, Soltústik Qazaqstan jáne Aqtóbe oblysyna memlekettik materıaldyq rezervten arnaıy jáne avtomobıl tehnıkasy, shatyrlar men tósek-oryn berildi. Ulttyq ulannyń avıatsııasymen Astanadan Qulsary qalasyna azyq-túlik, qapshyqtar men motopompalar jetkiziledi. Qutqarýshylardyń, jergilikti atqarýshy organdar men volonterlerdiń birlesken jumysynyń nátıjesinde 80 myńnan astam turǵyny bar 135 eldi meken jáne 21 myńnan astam ártúrli maqsattaǵy ǵımarattar men qurylystar topan sýdan aman qaldy», - dedi Qaharman Orazalın Ortalyq kommýnıkatsııalar qyzmeti alańynda ótken baspasóz máslıhatynda.
TJM ókiliniń málimetinshe, Aqtóbe oblysynda Qorǵanys mınıstrliginiń ınjenerlik áskerleriniń ýaqytsha ponton-kópir parkin ornatýynyń arqasynda Oıyl aýdan ortalyǵymen baılanys qalpyna keltirildi.
«Sońǵy táýlikte Tótenshe jaǵdaılar mınıstrligi men Qorǵanys mınıstrliginiń kúshteri men quraldary Mańǵystaý oblysynan Atyraý jáne Qulsary qalasyna aýystyryldy. Barlyq kúshter men quraldar sý tasqynynyń saldaryn boldyrmaýǵa jáne joıýǵa baǵyttalǵan. Tótenshe jaǵdaı ýshyqqan jaǵdaıda qosymsha sharalar qabyldanady. Avarııalyq-qutqarý sharalary jumysyn táýlik boıy jalǵastyrady», - dep tolyqtyrdy spıker.
Buǵan deıin sý basqan óńirlerdegi sońǵy jaǵdaı týraly habarlaǵan edik.
