Qulsary qalasyna 30 polıtseı men Ulttyq ulannyń 80 sarbazy kele jatyr
ATYRAÝ. KAZINFORM – Atyraý oblysyndaǵy Qulsary qalasyna 30 polıtseı men Ulttyq ulannyń 80 sarbazy kele jatyr.
Atyraý oblystyq jedel shtabtyń málimetinshe, Qulsary qalasyna polıtsııa departamenti bastyǵynyń orynbasary Bolat Kóshqalıev bastaǵan 50 tártip saqshysy kelgen.
Olar Jylyoı aýdandyq polıtsııa bóliminiń jeke quramymen birge tasqyn sýdan zardap shekkenderdi evakýatsııalaý jáne qoǵamdyq qaýipsizdikti qamtamasyz etýge kiristi.
Sondaı-aq, Ulttyq ulannyń 75 sarbazy da Qulsary qalasyndaǵy turǵyndardy qaýipsiz jerge kóshirý, qoǵamdyq qaýipsizdikti kúsheıtý men quqyq buzýdyń aldyn alý sharalaryna kómektesip júr.
«Qulsary qalasyndaǵy tasqyn sýdan zardap shekkenderge kómek kórsetý maqsatynda 6 sáýir kúni qosymsha polıtseıler men sarbazdar keledi. Onyń ishinde polıtsııa departamentiniń 30 qyzmetkeri men Ulttyq ulannyń 80 sarbazy bar» dep habarlady oblystyq jedel shtabtan.
Eske sala ketelik, budan buryn tasqyn sýdyń qaýpine baılanysty Jylyoı aýdanynda tótenshe jaǵdaı jarııalandy.
Kúndiz Qulsarydan Dossorǵa deıingi joldyń bir bóligin sý basty.
Búgin tasqyn sý Qulsary qalasyna kire bastaǵanyn habarlaǵan bolatynbyz.
