Qulsarydan Reseıdegi emdeý pansıonatyna demalýǵa barǵan 54 oqýshy úıine oraldy

ATYRAÝ. KAZINFORM – Atyraý oblysyndaǵy Qulsary qalasynan 174 oqýshy Reseıdegi emdeý pansıonatyna demalýǵa barǵan edi. Búgin 54 oqýshy úıine oraldy, al, 120 bala demalysyn jalǵastyryp jatyr.

Atyraý oblystyq bilim berý basqarmasynyń baspasóz qyzmetinen málim etkendeı, bul oqýshylar ata-anasynan ótinishine baılanysty oralǵan.

«Jeleznovodsk qalasynyń mańyndaǵy Inozemtsevo kentinde ornalasqan «Qazaqstan Geologi» pansıonaty aýmaǵynda jańbyr jaýǵan. Sonyń saldarynan tabıǵatta qońyz kóbeıgen. Emdeý pansıonatyndaǵy korpýstyń keıbir bólmesinen qońyz tabylǵan. Osyǵan baılanysty ata-analardyń bir toby balalaryn elge qaıtarýǵa ótinish bildirdi. Bilim basqarmasy 54 balanyń úıine aman-esen oralýyn uıymdastyrdy. Oqýshylardyń joldaǵy qaýipsizdigin 5 jetekshi qamtamasyz etti. Al, 120 oqýshy demalysyn jalǵastyryp jatyr. Olardyń qasynda 13 pedagog bar», - dep habarlady basqarmanyń baspasóz qyzmeti.

Al, Pıatıgorsk qalasyndaǵy «Gıgıena jáne epıdemıologııa» ortalyǵynyń jalpy gıgıena jónindegi dárigeri S.Kozyrev «Qazaqstan Geologi» emdeý pansıonatyna tekserý júrgizgen. Dáriger pansıonat bólmesine kirgen qońyzdyń adam densaýlyǵyna zııany joq degen qorytyndy bergen. Qońyz tabylǵan bólmelerde qosymsha dezınsektsııalaý jumysy júrgizilgen.

Eske sala ketelik, budan buryn Reseıge demalýǵa barǵan oqýshylar keri oralatynyn jazǵan bolatynbyz.

Keıin Qulsarydan Reseıge barǵan 120 oqýshy demalysyn jalǵastyratynynyn habarlaǵan edik.