Qulsaryda 28 myńnan astam adam qaýipsiz jerge kóshirildi
ATYRAÝ. KAZINFORM — QR Tótenshe jaǵdaılar mınıstrliginiń baspasóz qyzmeti Atyraý oblysy Jylyoı aýdanynyń Qulsary qalasynda qutqarý jumystary áli de jalǵasyp jatqanyn habarlady.
«Qutqarýshylar turǵyndar men olardyń úı janýarlaryn evakýatsııalaýǵa kómektesip jatyr. Qazirge deıin Jylyoı aýdanynda 28 501 turǵyn, onyń ishinde 6 781 bala evakýatsııalandy» — delingen habarlamada.
Eske sala ketelik, budan buryn tasqyn sýdyń qaýpine baılanysty Jylyoı aýdanynda tótenshe jaǵdaı jarııalandy.
Kúndiz Qulsarydan Dossorǵa deıingi joldyń bir bóligin sý basty.
5 sáýir kúni tasqyn sý Qulsary qalasyna kire bastaǵanyn habarlaǵan bolatynbyz.
Beıneý aýdanyna Mańǵystaý oblystyq aýrýhanasynyń dárigerleri medıtsınıalyq kómek kórsetýge arnaıy bardy.
Sondaı-aq Beıneý aýdanynda Qulsarydan kelgen 2,5 myń adam ornalasyp úlgerdi. Aqtaý qalasynda da sýdan zardap shekken Qulsary turǵyndary úshin evakýatsııalyq pýnkt ashyldy.
Sonymen qatar Mańǵystaýda azyq-túlik qory jetkilikti ekenin resmı oryndar málimdedi.
Sý basý kezinde Qulsarydaǵy aýrýhanadan 77 naýqasty Mańǵystaý oblysyna jetkizdi.
