Qulsarydaǵy jarylysqa deıin 21 janarmaı beketinde zańbuzýshylyq tirkelgen — Prokýratýra
ATYRAÝ. KAZINFORM — bıyl 30 mamyrda Atyraý oblysy Jylyoı aýdany, Qulsary qalasyndaǵy «Nıet-3» janar-jaǵarmaı jáne gaz quıý beketinde oryn alǵan jarylystan 14 adam zardap shegip, 2 adam qaza tapqan bolatyn.
Osy oqıǵa boıynsha qylmystyq is tirkelip, sotqa deıingi tergep-tekserý amaldary bastalǵan edi. Atalǵan oqıǵaǵa baılanysty Kazinform agenttigi oqıǵanyń mán-jaıyn anyqtaý maqsatynda Atyraý oblysynyń prokýratýrasyna resmı saýal joldady.
Vedomstvo usynǵan jaýapqa sáıkes, jarylysqa deıin de janarmaı quıý beketterindegi zań talaptarynyń saqtalýyna qatysty birqatar taldaý jumystary júrgizilgen.
— Bıyl sáýir aıynda aýdan prokýratýrasy ónerkásip obektileri, onyń ishinde gaz quıý stantsııalary boıynsha ónerkásiptik qaýipsizdik jáne sanıtarııalyq-epıdemıologııalyq talaptardyń saqtalýyn zerdelep, anyqtalǵan zań buzýshylyqtar negizinde 28.04.2025 jyly Jylyoı aýdany ákimdigine zańdylyqty buzýdy joıý týraly usynys engizildi, — delingen prokýratýra usynǵan resmı qujatta.
Tekserýler nátıjesinde Jylyoı aýdandyq sanıtarııalyq-epıdemıologııalyq baqylaý basqarmasy janar-jaǵarmaı beketterinde jospardan tys 16 tekserý júrgizip, 22 obekti boıynsha Ákimshilik kodekstiń 425-baby (Halyqtyń sanıtarııalyq-epıdemıologııalyq salamattylyǵy salasyndaǵy zańnamany buzý) jáne 463-baby (Ruqsattar men habarlamalar týraly zańnamany buzý) negizinde 21 ákimshilik quqyq buzýshylyq faktisi boıynsha hattama toltyrylǵan.
Sonymen qatar qazirgi tańda Atyraý oblysynyń Tótenshe jaǵdaılar departamentiniń Ónerkásiptik qaýipsizdik basqarmasy tarapynan janarmaı quıý beketterinde ónerkásiptik qaýipsizdik qaǵıdalarynyń saqtalýyna tekseris júrgizilip jatyr.
— Atalǵan fakti boıynsha sotqa deıingi tergep-tekserý Atyraý oblystyq polıtsııa departamentimen jalǵasyp jatyr. Kúdikti tulǵaǵa qatysty bultartpaý sharasy retinde «úıqamaq» qoldanyldy. Qylmystyq-protsestik kodekstiń 201-babyna sáıkes, ózge aqparattar jarııalanýǵa jatpaıdy, — dep naqtylady prokýratýradan.
Buǵan deıin Atyraý oblysy Qulsary qalasynda janarmaı beketindegi jarylysqa qatysty aýdandyq polıtsııa bólimi qylmystyq is qozǵap, keshendi tergeý amaldaryn bastalǵanyn jazǵanbyz.