Qulsarydaǵy jarylys janar-jaǵarmaı beketindegi rezervýarǵa gaz quıý kezinde bolǵan
ATYRAÝ. KAZINFORM – Atyraý oblysynyń Qulsary qalasynda gaz tasıtyn kólikten janar-jaǵar maı beketindegi rezervýarǵa gaz quıý kezinde jarylys bolǵany anyqtaldy.
Bul týraly Atyraý oblystyq Tótenshe jaǵdaılar departamenti bastyǵynyń mindetin atqarýshy, azamattyq qorǵaý polkovnıgi Nazaralı Selımov habarlady.
– Gaz tasıtyn kólikten rezervýarǵa gaz quıylǵan. Sol kezde jarylys bolǵan. Jarylys saldarynan janar-jaǵarmaı beketiniń qasyndaǵy 1 qabatty nysan men 2 qabatty ǵımarat janyp ketkeni anyqtaldy. Jalyn sharpyǵan aýmaq – 450 sharshy metr. Órtti sóndirýge tótenshe jaǵdaılar departamentinen 60 adam, 10 tehnıka tartyldy, - dep málim etti Nazaralı Selımov.
Sondaı-aq, Maqat aýdanynyń Dossor kentinen, Qulsary qalasyna taıaý ornalasqan Jańaqaraton kentinen arnaıy tehnıkalar men órt sóndirýshiler kómekke kelgen.
Eske sala ketelik, budan buryn Qulsaryda gaz-aýa qospasy jarylyp, 2 adam qaza tapqanyn jazǵan bolatynbyz.
Keıin Atyraý oblysynyń ákimi Serik Shápkenov Qulsarydaǵy jarylysqa baılanysty jedel shtab otyrysyn ótkizdi.
Sondaı-aq dárigerler zardap shekkenderdiń jaǵdaıy týraly aıtty.
Al polıtseıler Qulsarydaǵy jarylysqa qatysty qylmystyq is qozǵady.
Qulsaryda janar-jaǵarmaı beketindegi órt sóndirilgenin habarlaǵan edik.