Qulsarydaǵy jarylys: Zardap shekkenderdiń jaǵdaıy qalaı
ASTANA. KAZINFORM — Qulsarydaǵy «Nıet» janar-jaǵar maı quıý beketindegi órtten zardap shekken 14 adam shuǵyl túrde Jylyoı aýdandyq ortalyq aýrýhanasynyń qabyldaý bólimine jetkizildi, dep habarlaıdy Atyraý oblysynyń densaýlyq saqtaý basqarmasy.
— 2025 jylǵy 30 mamyrdaǵy jaǵdaı boıynsha Qulsarydaǵy «Nıet» janar-jaǵar maı quıý beketindegi órtten zardap shekken 14 adam shuǵyl túrde Jylyoı aýdandyq ortalyq aýrýhanasynyń qabyldaý bólimine jetkizildi. Qazirgi ýaqytta olardyń ómirine qaýip joq. Bastapqy medıtsınalyq tekserý men tıisti dıagnostıkadan soń 10 naýqas aýrýhanaǵa jatqyzyldy. Tórt adam ambýlatorııalyq baqylaýda. Qazirgi jaǵdaıda aýyr reanımatsııalyq naýqas joq, — delingen habarlamada.
Oblystyq densaýlyq saqtaý basqarmasynyń málimetinshe, aýrýhanaǵa jatqyzylǵan 7 naýqastyń jaǵdaıy — ortasha aýyr, 3 patsıenttiki — turaqty.
— Zardap shekkender tıisti medıtsınalyq kómekti tolyqtaı qamtyldy. Aımaq basshysynyń tapsyrmasy boıynsha Jylyoı aýdandyq ortalyq aýrýhanasyna Atyraýdan mamandar men medıtsına qyzmetkerleri qosymsha kómekke jiberildi, olardyń qatarynda kúıik ortalyǵynyń dárigerleri de bar, — delingen basqarma taratqan málimette.
Buǵan deıin Qulsaryda gaz-aýa qospasy jarylyp, 2 adam qaza tapqanyn jazdyq.
Keıinnen Serik Shápkenov Qulsarydaǵy janar-jaǵar maı beketinde bolǵan órtke qatysty jedel shtab otyrysyn ótkizdi.