Qulsarydaǵy jarylys: Polıtsııa áli kúnge deıin tergeý júrgizip jatyr

ATYRAÝ. KAZINFORM — Іs Qylmystyq kodekstiń «Jarylys qaýpi bar obektilerde qaýipsizdik qaǵıdalaryn buzý» baby boıynsha qozǵalǵan. Kúdikti qamaýda. 

Kazinform tilshisi ІІM-nen Atyraý oblysy Qulsary qalasyndaǵy janar-jaǵarmaı beketinde bolǵan jarysqa qatysty saýal joldaǵan edi. ІІM tergeý jumysy jalǵasyp jatqanyn aıtty.

— Atyraý oblysyndaǵy avtojanarmaı beketinde bolǵan órt oqıǵasy boıynsha Qylmystyq kodekstiń 281-baby 3-bólimi negizinde qylmystyq is qozǵalyp, saraptama taǵaıyndaldy. Kúdikti qamaýǵa alyndy. QPK-niń 201-babyna sáıkes sotqa deıingi tergep-tekserý derekteri jarııalaýǵa jatpaıdy, — dep habarlady ІІM-niń baspasóz qyzmeti.

Qylmystyq kodekstiń «Jarylys qaýpi bar obektilerde qaýipsizdik qaǵıdalaryn buzý» baby 3-bóliminde belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp nemese onsyz, úsh jyldan segiz jylǵa deıingi merzimge bas bostandyǵynan aıyrý jazasy qarastyrylǵan.

Eske salsaq, bıyl 30-mamyrda Qulsaryda gaz-aýa qospasy jarylyp, 2 adam qaza tapty.Sol kúni Atyraý oblysynyń ákimi Serik Shápkenov Jylyoı aýdany Qulsary qalasyndaǵy «Nıet» janar-jaǵar maı quıý beketindegi órt pen jarylysqa qatysty jedel shtabtyń shuǵyl otyrysyn ótkizdi.

Órtten zardap shekken 14 adam shuǵyl túrde Jylyoı aýdandyq ortalyq aýrýhanasynyń qabyldaý bólimine jetkizildi. Jarylystan soń qylmystyq is qozǵalyp, tergeý bastaldy. 

Keıin gaz tasıtyn kólikten janar-jaǵar maı beketindegi rezervýarǵa gaz quıý kezinde jarylys bolǵany anyqtaldy.