Qulsarydaǵy janjal: 17 jasar jasóspirimniń ólimine baılanysty is áli tergelip jatyr
ATYRAÝ. KAZINFORM – Atyraý oblysyndaǵy Qulsary qalasynda bir jyl buryn toptyq tóbeleste jaraqat alǵan 17 jasar jasóspirim aýrýhanada kóz jumǵan edi. Osyǵan baılanysty qylmystyq isti tergeý áli aıaqtalǵan joq.
Atyraý oblystyq polıtsııa departamenti baspasóz qyzmetiniń málimetinshe, toptyq tóbeles 2024 jyldyń 19 qańtarynda túngi mezgilde bolǵan.
Toptyq tóbelestiń saldarynan 3 adam túrli dene jaraqatymen Jylyoı aýdandyq ortalyq aýrýhanasyna jetkizilgen. Onyń biri – 2006 jylǵy jasóspirim aýrýhananyń jansaqtaý bóliminde kóz jumǵan.
– Tergeý barysynda oqıǵanyń barlyq qatysýshysy anyqtaldy. Kúdiktilerge qatysty adam ólimine ákep soqqan densaýlyqqa qasaqana aýyr zııan keltirý, sondaı-aq buzaqylyq baptarymen qylmystyq is qozǵaldy. Sot organymen 4 kúdikti bultartpaý sharasymen qamaýǵa, 7 kúdikti úıqamaqqa alyndy. Qylmystyq iske qatysty keshendi tergeý amaldary júrgizildi. Tıisti sot saraptamalary ótkizilip jatyr. Tergeý amaldary aıaqtalǵan soń qylmystyq is sotqa joldanady. Sotqa deıingi tergeýge qatysty ózge aqparat QR Qylmystyq-protsessýaldyq kodeksiniń 201-babyna sáıkes jarııalaýǵa jatpaıdy, - dep habarlady departamenttiń baspasóz qyzmeti.
Eske sala ketelik, budan buryn Qulsary qalasyndaǵy jappaı tóbelesten jaraqat alǵan bir jasóspirim kóz jumǵanyn jazǵan edik.