Qulsarydaǵy janarmaı beketindegi jarylys: kásipkerdiń jazasyna ózgeris engizildi
ATYRAÝ. KAZINFORM – Qulsary qalasyndaǵy «Nıet» janarmaı beketinde bolǵan jarylysqa baılanysty sottalǵan kásipkerdiń jazasyna qatysty apellıatsııalyq sot sheshim shyǵardy. Atyraý oblystyq sotynyń qylmystyq ister jónindegi sot alqasy negizgi jazany ózgerissiz qaldyryp, qosymsha jaza bóligin naqtylady.
Sot alqasy tek prokýrordyń ótinishin qanaǵattandyryp, sottalǵan azamatqa ónerkásiptik qaýipsizdik salasyndaǵy belgili bir qyzmetpen aınalysý quqyǵynan 3 jyl merzimge aıyrý jazasyna ózgeris engizdi. Naqtyraq aıtqanda, kásipker úkimge engen ózgeriske sáıkes 3 jyl boıy jarylys qaýpi bar obektilerde basshylyq laýazym atqara almaıdy.
Atyraý oblystyq sotynyń qylmystyq ister jónindegi sot alqasynyń tóraǵasy Tátti Ýálıevanyń aıtýynsha, apellıatsııalyq shaǵymdarda keltirilgen barlyq ýáj muqııat zerttelip, olarǵa tıisti baǵa berilgen.
- Sot apellıatsııalyq shaǵymdarda kórsetilgen barlyq ýájdi muqııat zerttep, olarǵa tıisti baǵa berdi. Sot alqasy bul tujyrymdarmen kelisti. Úkim qylmystyq quqyq buzýshylyq saldarynyń durys kórsetilmeýine baılanysty naqtylandy. Atap aıtqanda, onyń áreketi eki adamǵa qatysty jasalǵany naqty kórsetilmegen. Bul – qylmystyq quqyq buzýshylyqtyń saralaý belgisi. Sonymen qatar, qosymsha jaza bóligi naqtylandy. Jalpy sot alqasy úkimmen kelisedi, – dedi Tátti Ýálıeva.
Buǵan deıin appelıatsııalyq sottyń otyrysynda aıyptalýshy men onyń qorǵaýshylary apellıatsııalyq shaǵymynda istiń birinshi satydaǵy sotta negizinen aıyptaý tarapynyń ustanymy negizinde qaralǵanyn alǵa tartty. Sondaı-aq olar jarylys kezinde qaza bolǵan jumysshylardyń da eńbek mindetterin tıisinshe oryndamaǵanyn aıtyp, jaza óteý merzimin azaıtýdy surady.
Al jábirlenýshi tarap bul ýájdi negizsiz dep sanap, qaza bolǵandardyń balalaryna 1 mlrd teńge moraldyq ótemaqy talap etti.
Eske salaıyq, byltyr Qulsarydaǵy «Nıet» janarmaı beketinde bolǵan jarylys saldarynan eki adam qaza taýyp, birneshe azamat jaraqat alǵan edi.
Tótenshe jaǵdaı kezinde alty kólik órtenip, bir qabatty úsh jáne eki qabatty bir ǵımarat búlingen. Jarylystyń áseri shamamen 400 sharshy metr aýmaqty qamtyǵan.
Maýsym aıynda sot kásipkerdi jarylysqa kináli dep tanyp, 3 jyl 6 aıǵa bas bostandyǵynan aıyrý týraly úkim shyǵarǵan. Sonymen qatar qaza bolǵan erli-zaıyptynyń tórt balasynyń árqaısysyna 10 mln teńgeden moraldyq ótemaqy tóleý mindettelgen. Úkimniń bul bóligi ózgerissiz qaldyryldy.
Buǵan deıin oblystyq tótenshe jaǵdaılar departamenti janarmaı beketinde jarylystyń sebebin málimdegen edi.
