Qulsarydaǵy tasqyn sý basqan úılerdi baǵalaý jumysy osy aptada aıaqtalady

ATYRAÝ. KAZINFORM – Qulsary qalasyndaǵy tasqyn sý basqan úılerdi baǵalaý jumysyn osy aptada aıaqtaý josparlanyp otyr.

Atyraý oblysynyń ákimi Serik Shápkenovtiń aıtýynsha, jyljymaıtyn múlikti baǵalaý komıssııasyna 2 727 ótinish túsken. 

«Sý basqan 1 myńǵa jýyq úı apatty dep tanyldy. Qazir 500 turǵynǵa baǵalaý qorytyndysy týraly aqparat berildi. Onyń ishinde apatty úıdiń 105 ıesi, baspanasyna kúrdeli jóndeý júrgiziletin 53 turǵyn ótemaqy somasyna kelisip, kelisim-shartqa otyrdy. Tasqyn sý kirgen úılerdi baǵalaý osy aptanyń aıaǵyna deıin júrgiziledi. Mamandar táýlik boıy jumys istep júr», - dedi Serik Shápkenov. 

Ákimniń deregine súıensek, 18 mamyrda Qulsary qalasynyń «Bolashaq» shaǵynaýdanynda 70 úıjiń qurylysy bastalǵan. Bul shaǵyn aýdanda 150 úı salý josparlanǵan. 

«Tasqynnan zardap shekken 301 kásipkerden keltirilgen shyǵyndy óteý boıynsha ótinish tústi. Olarǵa keńes berý ortalyǵy ashyldy. Turǵyndardan múliktik zalaldy óteýge 2 707 ótinish túsip, onyń 416-nyń qorytyndysy daıyn boldy. Múliktiń zalal úshin 150 aılyq eseptik kórsetkish kóleminde ótemaqy beriledi», -dep málim etti Serik Shápkenov.

Sondaı-aq, erteń, 21 mamyrda sý tasqynnan qyrylǵan malǵa ótemaqy tóleý bastalady.

Eske sala ketelik, budan buryn Qulsaryǵa 1 myń tonnadan astam gýmanıtarlyq kómek jetkizilgenin jazǵan edik.