Qulsarydaǵy sý tasqynynan keıin apatty jaǵdaıda turǵan 756 úı anyqtaldy

ATYRAÝ. KAZINFORM – Atyraý oblysynyń Qulsary qalasyndaǵy sý tasqynynan keıin apatty jaǵdaıda turǵan 756 úı anyqtaldy.

Búgin Atyraý oblysynyń ákimi Serik Shápkenov Qulsarydaǵy sý tasqynan zardap shekken turǵyndarmen kezdesti. Ol turǵyndardyń usynys-talabyn tyńdap, sý tasqynynan zardap shekkenderge keltirilgen zalaldy óteý tártibin túsindirdi.

Ákimniń pikirinshe, úıi apatty dep tanylǵan turǵyndarǵa ótemaqy naryqtaǵy qunyna sáıkes tólenedi. Sý tasqyny kezinde zardap shekken Qulsary qalasynyń turǵyndary aqshalaı ótemaqyny nysanaly maqsaty boıynsha – jańa turǵyn úı satyp alýǵa, turǵyn úı salýǵa nemese jóndeý-qalpyna keltirý jumystaryna jumsaýǵa tıis.

«Qazir birinshi kezekte sý tasqynynan zardap shekken turǵyndar baǵalaý jáne múlikti tehnıkalyq saraptaý qorytyndylarymen tanysyp, aqshalaı qarajatty tóleýge óz kelisimin berýi tıis. Tólem eki apta ishinde júrgiziledi», -dedi Serik Shápkenov.

Atyraý oblysy jedel shtabynyń málimetinshe, keshe, 15 mamyrda Qulsary qalasynda jyljymaıtyn múlikti baǵalaý jáne tehnıkalyq saraptaý qorytyndylaryn jarııalaý boıynsha mobıldi toptardyń jumysy bastaldy. Jylyoı aýdanynyń 100-den astam turǵyny baǵalaý paraǵyn alǵan. Endi olar eki kún ishinde aqshalaı ótemaqy alýǵa ótinish bere alady. Sý tasqynynan búlingen barlyq úıdi baǵalaý jumysyn 10 kúnde aıaqtaý josparlanǵan.

«Búgin, 16 mamyrǵa deıin Jylyoı aýdanynda 3613 otbasyǵa 100 aılyq eseptik kórsetkish mólsherinde birjolǵy tólem berildi. Tólengen qarjynyń jalpy somasy – 1 mlrd 387 mln teńge. Keltirilgen materıaldyq zalalǵa ótemaqy tóleý úshin qujattar daıyndalady. Jyljymaıtyn múlikke tehnıkalyq tekserý jáne baǵalaý júrgizilip jatyr. Qazir turǵyndardan 2950 ótinish qabyldandy. Onyń ishinde 2697 ótinish qaraýǵa jiberildi. Qulsaryda 2624 úıge baǵalaý jáne 2671 úıge tehnıkalyq tekserý júrgizildi. Apatty jaǵdaıda turǵan 756 úı anyqtaldy», -dep habarlady oblystyq jedel shtabtan.

Eske sala ketelik, buǵan deıinQulsary turǵyndary aldaǵy 2-3 kúnde ótemaqy alý úshin ákimdikke júgine alatynyn jazǵan bolatynbyz.