Qulsarydaǵy sý basqan aýmaqty tazartý mamyrǵa deıin aıaqtalady

ATYRAÝ. KAZINFORM – Atyraý oblysynyń Qulsary qalasyndaǵy sý basqan aýmaqty tazartýdy mamyrǵa deıin aıaqtaý josparlanyp otyr.

Atyraý oblysynyń ákimi Serik Shápkenov málimetine súıensek, Jem ózeni arnasynan asyp, Qulsary qalasyndaǵy 2 920 úı sý astynda qalǵan.

«Qazir 1,2 mln tekshe metrden astam sý soryldy. Sonyń nátıjesinde 1 345 turǵyn úı, 55 áleýmettik nysan sýdan tazartylyp, turǵyndar úıine oralyp jatyr. Tasqyn sý basqan aýmaqtardy tolyq tazartý jumystaryn mamyrǵa deıin tolyq aıaqtaý josparlanyp otyr», - deıdi Serik Shápkenov.

Ákimniń aıtýynsha, Qulsary qalasynda dezınfektsııalaý jumystary qolǵa alynǵan. Zardap shekken turǵyndarǵa ýaqytsha páter jaldaý jaldaý úshin 100 aılyq eseptik kórsetkish kólemindegi 369 myń 200 teńge bir rettik tólem, basqa da qajettiligi úshin kómek kórsetilip jatyr.

«Jylyoı aýdanynyń turǵyndardan 3 398 ótinish túsip, 3 271 turǵynǵa jergilikti bıýdjetten 1,2 mlrd teńge tólendi. Tasqyn sýdan kelgen zalaldy anyqtaý maqsatynda ákimdik janynan komıssııa qurylyp, 2 272 turǵynnyń ótinishi qabyldandy. Arnaıy mekemeler sý basqan nysandarda tehnıkalyq zerdeleý jáne baǵalaý jumystaryn júrgizip jatyr. Turǵyndar ótinishi óziminiń jiti baqylaýymda bolady», - dedi Serik Shápkenov.

Eske sala ketelik, budan buryn Jylyoı aýdanyndaǵy sý tasqynynan zardap shekken 3271 otbasyna 1,2 mlrd teńge tólengenin habarlaǵan edik.