Qulsarydaǵy órt: 6 azamat ambýlatorııalyq em alý úshin úılerine jiberildi
ASTANA. KAZINFORM — Atyraý oblysy ákiminiń orynbasary Qaırat Nurtaev, Jylyoı aýdanynyń ákimi Jumabek Qarajanov jáne TJD ókilderi Qulsarydaǵy janar-jaǵarmaı quıý beketinde bolǵan órtten zardap shekkenderdiń jaǵdaıyn bildi.
Qyzyl jalynnyń saldarynan jalpy sany 16 adam zardap shekti. 31 mamyrdaǵy jaǵdaı boıynsha 5 azamat aýdandyq aýrýhanada jatyr. Alty adam ambýlatorııalyq em alý úshin úılerine jiberildi. Sonymen qatar úsh naýqas oblystyq aýrýhanaǵa aýystyryldy.
— Aýrýhanadaǵy medıtsınalyq kómek kórsetilip jatqan patsıentterdiń jasy —25-75 aralyǵynda. Olardyń kúıik shalý kórsetkishi 5-22 paıyz arasynda. Patsıentterdiń jaǵdaıy turaqty. Olardyń ómirine qaýip tónip turǵan joq, — dedi Jylyoı aýdandyq aýrýhanasynyń dırektory Asýlan Abdrahmanov.
Atyraý oblysy ákiminiń tapsyrmasymen 30 mamyr kúni Atyraý qalasynan Qulsaryǵa 4 dáriger jiberildi .
Atyraý oblysy Tótenshe jaǵdaılar departamenti ókilderiniń boljamynsha, jarylys gaz tasıtyn júk kóliginen rezervýarǵa avtogaz quıylyp jatqan ýaqytta bolǵan. Saldarynan eki ǵımarat órtendi. Qyzyl jalyn 450 sharshy metr aýmaqty sharpydy.
— Qazirgi ýaqytta órttiń sebebin anyqtaý maqsatynda departamentten úsh, aýdandyq tótenshe jaǵdaılar bóliminen taǵy úsh maman oqıǵa bolǵan jerde jumys istep jatyr, — dedi Atyraý oblystyq TJD bastyǵynyń orynbasary Narıman Óteshov.
Atyraý oblysy ákiminiń orynbasary Qaırat Nurtaev jáne jergilikti atqarýshy organ ókilderi órt saldarynan qaıtys bolǵan 2 azamattyń úıine baryp, týǵan-týystaryna kóńil aıtty. Jylyoı ákimdigi tarapynan atalǵan januıaǵa qajetti kómek kórsetiledi.
Eske sala ketelik, budan buryn Qulsaryda gaz-aýa qospasy jarylyp, 2 adam qaza tapqanyn jazǵan bolatynbyz.
Keıin Atyraý oblysynyń ákimi Serik Shápkenov Qulsarydaǵy jarylysqa baılanysty jedel shtab otyrysyn ótkizdi.
Sondaı-aq dárigerler zardap shekkenderdiń jaǵdaıy týraly aıtty.
Al polıtseıler Qulsarydaǵy jarylysqa qatysty qylmystyq is qozǵady.
Qulsaryda janar-jaǵarmaı beketindegi órt sóndirilgenin habarlaǵan edik.