Qulsarydaǵy 8 jasar qyzdyń ólimi: Kúdikti ustalyp, qylmystyq is qozǵaldy

ATYRAÝ. KAZINFORM – Atyraý oblysynyń Qulsary qalasynda 8 jasar qyzdyń máıiti Qursaı ózeginen tabyldy. Jasóspirimniń ólimine qatysy bar kúdikti ustalyp, qamaýǵa alyndy.

Atyraý oblystyq polıtsııa departamentiniń baspasóz qyzmetinen málim etkendeı, 8 jasar qyz 5 maýsymda úıinen shyǵyp ketken. Qulsary qalasyndaǵy kóshe kamerasyna er adamnyń jasóspirimdi ertip bara jatqany túsken. 

– Jylyoı aýdandyq polıtsııa bóliminiń qyzmetkerleri jedel-izdestirý is-sharasyn júrgizdi. Jasóspirimdi óltirdi degen kúdikpen Qulsary qalasynyń 36 jastaǵy turǵyny jedel ustaldy. Kúdikti ýaqytsha ustaý ızolıatoryna jetkizildi. Keıin sot sanktsııasymen qamaýǵa alyndy, -dep habarlady departamenttiń baspasóz qyzmeti.

Qazir atalǵan derekke qylmystyq is qozǵaldy. Oqıǵanyń barlyq mán-jaıyn anyqtaý maqsatynda tergeý júrgizilip jatyr. 

– Elimizde mundaı aýyr qylmys úshin eń qatań jaza qarastyrylǵan. Jasóspirimniń ólimine baılanysty qozǵalǵan qylmystyq isti tergeý barasy Atyraý oblystyq polıtsııa departamenti bastyǵynyń erekshe baqylaýyna alyndy, -dep málim etti departamenttiń baspasóz qyzmetinen.

Eske sala ketelik, budan buryn Qulsaryda joǵalyp ketken 8 jasar qyzdyń múrdesi Qursaı ózeginen tabylǵanyn jazǵan bolatynbyz.