Qulsaryda jóndeýine 2,1 mlrd teńge bólingen áleýmettik qyzmetter ortalyǵy bos tur
ATYRAÝ. KAZINFORM — Atyraý oblysynyń Qulsary qalasyndaǵy № 2 áleýmettik qyzmetter ortalyǵyn jóndeýge bıýdjetten 2,1 mlrd teńge bólingen. Alaıda, nysannyń jobalyq-smetalyq qujattamasyna sáıkes emestigi anyqtalǵan.
Sybaılas jemqorlyqqa qarsy is-qımyl agenttigi Atyraý oblystyq departamentiniń qyzmetkerleri jemqorlyqqa qarsy eriktilermen birge áleýmettik mańyzy bar obektilerdiń qurylysyna turaqty monıtorıng júrgizip keledi.
«Jylyoı aýdanynyń ortalyǵy — Qulsary qalasyndaǵy № 2 arnaýly áleýmettik qyzmetter ortalyǵyn jóndeý jumystaryna bıýdjetten 2,1 mlrd teńgeden astam qarjy bólingen. Monıtorıng kezinde obektiniń jobalyq smetalyq qujattamasyna sáıkessizdigi anyqtaldy. Mysaly, jobalyq-smetalyq qujattamaǵa sáıkes terezeler jańasyna aýystyrylýy kerek edi. Alaıda, polıvınılhlorıdtan jasalǵan tereze bloktary múldem aýystyrylmaǵany anyqtaldy. Tereze taqtalaryn ózdiginen jabysatyn aq qaǵazben jabý arqyly jańa terezelerge uqsatyp qoıǵan. Jobalyq-smetalyq qujattama boıynsha tek bas ǵımarattaǵy 200 terezeni jańasyna aýystyrý úshin bıýdjetten 53,1 mln teńge bólinip, tólenip qoıǵan», -dep habarlady departamenttiń baspasóz qyzmeti.
Sondaı-aq, nysannyń mıneraldy talshyqty plıtalarmen qaptalǵan shatyry qazirdiń ózinde qıraǵan.
Dýsh kabınalarynda sý aǵatyn krandar joq. Esiksiz metall shkaf, kereýetter jaramsyz kúıge túsken.
«Atalǵan nysan 2023 jyldyń 28 jeltoqsanynda paıdalanýǵa berildi. Jaýapty memlekettik organdar ókilderiniń aıtýynsha, arnaıy ortalyqta emdelýge muqtaj psıhonevrologııalyq syrqaty bar eresek patsıentter tiziminde 150-ge jýyq adam tirkelgen. Naýqastar paıdalanýǵa berilgennen keıin jańa ortalyqqa ornalastyrylady. Alaıda, ortalyq 7 aıdan beri bos tur», -dep málim etti departamenttiń baspasóz qyzmeti.
Eske sala ketelik, budan buryn jergilikti Antıkor Atyraý ákimdiginiń aýla abattandyrýǵa 800 mln teńgeni ysyrap etkenin habarlaǵan edi.
