Qulsaryda jolǵa tóselgen asfalttyń qalyńdyǵy jobaǵa saı emes
ATYRAÝ. KAZINFORM — Atyraý oblysynyń Qulsary qalasynda 12,1 shaqyrym joldy jańartýǵa 2,4 mlrd teńge bólingen. Alaıda, jolǵa tóselgen asfalttyń qalyńdyǵy jobaǵa sáıkes emesi anyqtalǵan.
Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, jol qurylysy salasyndaǵy quqyq buzýshylyqtyń aldyn alýǵa erekshe nazar aýdarylyp otyr.
Qazir sybaılas jemqorlyq táýekelderiniń kartasyna engizilgen jáne salynyp jatqan avtomobıl jolyna syrtqy taldaý bastaldy.
Máselen Qulsary qalasyndaǵy qaıta jańartylyp jatqan joldyń sapasyna monıtorıng júrgizilgen.
Oǵan «Ádildik joly» RQB Atyraý oblystyq fılıalynyń, merdigerlik mekemeniń, avtorlyq jáne tehnıkalyq qadaǵalaý ókilderi, sondaı-aq, Ulttyq jol aktıvteriniń sapa ortalyǵy Atyraý fılıalynyń ınjenerleri qatysqan.
«Jylyoı aýdanynda sý tasqyny kezinde búlingen jol qalpyna keltirilip jatyr. Aýdan ortalyǵy — Qulsary qalasynyń 18 kóshesindegi uzyndyǵy 12,1 shaqyrym joldy qaıta jańartýǵa 2,4 mlrd teńgeden astam qarajat bólindi. Máselen Dýman shaǵynaýdanynda, 181a, Balýan Sholaq jáne A.Begebaev kóshelerindegi asfaltbetonnan kern alynyp, qalyńdyǵy tekserildi. Jobalyq-smetalyq qujattamaǵa sáıkes usaq túıirshikti asfaltbetonnyń qalyńdyǵy 4 sm bolýǵa tıis. Alaıda, asfalttyń qalyńdyǵy 3,6 sm ekeni anyqtaldy», -dep habarlady departamenttiń baspasóz qyzmeti.
Sondaı-aq, monıtorıng kezinde Jylyoı aýdandyq turǵyn úı kommýnaldyq sharýashylyǵy, jolaýshylar kóligi, avtomobılder joldary jáne turǵyn úı ınspektsııasy bólimi Ájiǵalıev kóshesine qatysty tıisti qujattardy, atap aıtqanda, aqaý vedomosin jáne saraptamalyq qorytyndyny usynbaǵany belgili bolǵan.
Eske sala ketelik, budan buryn Qulsaryda jóndeýine 2,1 mlrd teńge bólingen áleýmettik qyzmetter ortalyǵy bos turǵanyn jazǵan edik.
