Qulsaryda jol apatynan zardap shekken 5 adam aýrýhanaǵa jetkizildi

ATYRAÝ. KAZINFORM — Jylyoı aýdanynyń ortalyǵy — Qulsary qalasynda 2 kólik soqtyǵysyp, 5 adam ortalyq aýrýhanaǵa tústi. Zardap shekkenderdiń 1-eýi oblystyq aýrýhanaǵa jiberilip, 2-ekeýi ambýlatorlyq baqylaýǵa alyndy. 

Atyraý oblystyq densaýlyq saqtaý basqarmasynyń baspasóz qyzmeti rastaǵan aqparatqa qaraǵanda, keshe, 17 sáýirde bolǵan jol-kólik oqıǵasynan keıin Jylyoı aýdandyq ortalyq aýrýhanasyna 5 adam jetkizilgen.

— Jol apatynan zardap shekken 2005 jáne 2006 jylǵy azamattar medıtsınalyq kómek alǵannan keıin túrli emdeý taktıkasyna sáıkes tıisti medıtsınalyq mekemelerge jiberildi. Olar ambýlatorlyq baqylaýǵa alyndy. Bir adamdy oblystyq aýrýhanaǵa jiberýge sheshim qabyldandy. Taǵy bir naýqas — 1983 jylǵy áıeldiń qazir jaǵdaıy turaqty aýyr dep baǵalanyp otyr. Al 2007 jyly týǵan jasóspirim dınamıkalyq baqylaýǵa alyndy. Naýqastarǵa barlyq qajetti medıtsınalyq kómek kórsetilip jatyr, - dep málim basqarmanyń baspasóz qyzmeti.

Polıtsııa qyzmetkerleriniń málimetinshe, jol oqıǵasy keshe, 17 sáýirde Qulsary qalasynda bolǵan.

Túngi saǵat 02:10 shamasynda Hyundai Elantra-ny aıdap kele jatqan 2005 jylǵy júrgizýshi Toyota Camry jáne VAZ-2115 kólikterimen soqtyǵysqan.

Jol-kólik oqıǵasynyń saldarynan 2 kóliktiń júrgizýshileri men 3 jolaýshy túrli dene jaraqattarymen Jylyoı aýdandyq aýrýhanasyna jetkizilgen. Toyota Camry kóliginiń rýlinde 2007 jylǵy jasóspirim bolǵan.

Eske sala ketelik, buǵan deıin Atyraý oblysynda bir kúnde jol apatynan 5 adam mert bolǵanyn jazǵan bolatynbyz.