Atyraý oblysynda joǵalyp ketken 8 jasar qyzdyń múrdesi tabyldy

ATYRAÝ. KAZINFORM – Atyraý oblysynda 8 jasar qyz iz-túzsiz joǵalyp ketti. Tún ortasynda onyń múrdesi Jylyoı aýdanyndaǵy Qursaı ózeginen tabyldy.

Bul derekti Atyraý oblystyq polıtsııa departamentiniń baspasóz qyzmeti rastady.

– Jylyoı aýdanynyń ortalyǵy – Qulsary qalasynda turatyn 2018 jyly týǵan jasóspirim 5 maýsym kúni saǵat 12:00 shamasynda úıinen shyǵyp ketken. Onyń úıinen ketkeni týraly habar polıtsııa bólimine keshki saǵat 21:28 shamasynda tústi. Jasóspirimniń joǵalǵan baǵyty belgisiz bolǵanyna baılanysty Qulsary qalasyndaǵy barlyq kameradaǵy jazbalar zerdelendi, -dep habarlady departamenttiń baspasóz qyzmeti.

Joǵalǵan jasóspirimdi izdeýge Jylyoı aýdandyq tótenshe jaǵdaılar bóliminiń qyzmetkerleri tartyldy. Turǵyndar da kómekke keldi.

– Búgin 6 maýsymda túngi saǵat 2:19 shamasynda Qursaı ózeginen jasóspirimniń denesi tabyldy. Qazir atalǵan derekke baılanysty saraptama taǵaıyndaldy, -dep málim etti departamenttiń baspasóz qyzmeti.

Eske sala ketelik, buǵan deıin Atyraý oblysyndaǵy Qamyskól kóline shomylýǵa ýaqytsha tyıym salynǵanyn habarlaǵan edik.