Qulsaryda janarmaı beketindegi jarylystyń sebebi belgili boldy
ATYRAÝ. KAZINFORM – Qulsarydaǵy janarmaı beketinde bolǵan jarylystan keıin Atyraý oblystyq tótenshe jaǵdaılar departamenti óńirdegi 31 gaz quıý stantsııasyna tekseris júrgizdi. Nátıjesinde úsh nysanda qysymmen jumys isteıtin ydystardyń avtokólik joldaryna tym jaqyn ornalasqany anyqtalǵan.
Oblystyq TJD bastyǵynyń orynbasary Syrym Jaımaǵambetovtiń aıtýynsha, ereje boıynsha mundaı ydystar qala ishindegi joldardan keminde 20 metr, al turǵyn úılerden 60 metr qashyqtyqta ornalasýy tıis.
– Jerdiń betinde turǵan ydystardy jobalaý jumystaryn júrgizip, jer astyna ornalastyrýǵa múmkindik bar. Osyǵan baılanysty kásipkerlerge qosymsha ýaqyt berilip otyr. Joba mindetti túrde TJD-men kelisilýi qajet. Eger qysymmen jumys isteıtin ydys jer astynda ornalassa, turǵyn úılerden araqashyqtyǵy keminde 35 metr bolýy kerek, – dedi Syrym Jaımaǵambetov.
TJD málimetinshe, Atyraý oblysynda 42 sýbekt avtogaz quıý qyzmetimen aınalysady. Qazir óńirde qysymmen jumys isteıtin 237 ydys tirkelgen. Onyń birnesheýi gazdy jınaqtap, saqtaýǵa arnalǵan arnaıy toltyrý pýnktterinde ornalasqan.
Mamandardyń aıtýynsha, paıdalanylǵanyna 30 jyldan asqan janarmaı saqtaý ydystary qaýipti sanatqa engizilip, jyl saıyn tekseriledi. Al paıdalaný merzimi bul mejege jetpegen nysandar úsh jylda bir ret baqylaýdan ótedi. Qazir óńirde qaýipti dep tanylǵan 20-ǵa jýyq ydys bar. Olar Atyraý qalasy, Jylyoı jáne Inder aýdandarynda ornalasqan.
Departament ókilderi byltyr 30 mamyrda Qulsarydaǵy «Nıet» janarmaı beketinde bolǵan jarylystyń sebebin de atady. Eske salaıyq, oqıǵa saldarynan erli-zaıypty qaza tapqan edi.
– Qysymmen jumys isteıtin ydystyń joǵarǵy bóliginde saqtandyrý klapany bolady. Ydysqa shamadan tys gaz quıylǵan jaǵdaıda klapan iske qosylyp, artyq gaz syrtqa shyǵýy kerek. Alaıda klapan jumys istemeı qalyp, artyq qysymnyń áserinen jarylys bolǵan, – dedi oblystyq TJD bastyǵynyń orynbasary.
Bul oqıǵaǵa qazir sotta qaralyp jatyr. Mamandar endi árbir mekemede óndiristik baqylaýǵa jaýapty arnaıy qyzmetker bolýy qajet ekenin aıtady. Ol maman qaýipsizdik talaptarynyń saqtalýyn qadaǵalaıdy.
Al Qulsarydaǵy jarylystan keıin oblystyq sanıtarııalyq-epıdemıologııalyq baqylaý departamenti Jylyoı aýdanyndaǵy 20-dan astam janar-jaǵarmaı quıý beketine jospardan tys tekseris júrgizgen. Nátıjesinde birqatar zańbuzýshylyq anyqtalyp, nysan ıelerine 22 mln teńgeden astam aıyppul salyndy.
Oblystyq sanıtarııalyq-epıdemıologııalyq baqylaý departamenti basshysynyń orynbasary Aıgúl Iskakovanyń aıtýynsha, tekseris barysynda barlyq nysanda sanıtarlyq qorǵaý aýmaǵy bekitilmegeni anyqtalǵan.
– Sanıtarlyq qorǵaý aımaǵy bekitilip, oǵan sanıtarııalyq-epıdemıologııalyq qorytyndy alynýy kerek edi. Alaıda mundaı qujattar bolmaǵan. Sondaı-aq bir nysannyń qyzmetin bastaý týraly zańǵa sáıkes habarlama bermegeni anyqtalyp, is Jylyoı aýdandyq sotyna joldandy. Keıin aıyppul salyndy, – dedi Aıgúl Iskakova.
Mamandardyń málimetinshe, ár janarmaı beketiniń sanıtarlyq qorǵaý aımaǵy keminde 100 metr bolýy tıis. Bul aýmaqta turǵyn úıler, demalys oryndary men balalar mekemeleri ornalaspaýy qajet.
Qazir Jylyoı aýdanyndaǵy barlyq nysanǵa sanıtarlyq qorǵaý aımaǵyn jasaý jóninde usynystar berilgen. Beket ıeleri jobalaryn ázirlep, tıisti basqarmadan qorytyndy alý jumystaryn júrgizip jatyr. Usynystar shilde aıyna deıin tolyq oryndalýy tıis.
Sonymen qatar janarmaı beketteri jylyna eki ret sanıtarlyq qorǵaý aımaǵyndaǵy atmosferalyq aýaǵa zertteý júrgizip, óndiristik baqylaý esebin tapsyrýǵa mindetti. Alaıda óńirdegi beketter bul talaptardy oryndaýǵa asyǵar emes.
– №62 sanıtarlyq qaǵıdalarǵa sáıkes, nysandar sanıtarlyq qorǵaý aýmaǵynda laboratorııalyq zertteý júrgizýi kerek. 100 metr aýmaqtaǵy atmosferalyq aýa hımııalyq jáne fızıkalyq faktorlar boıynsha tekseriledi. Onyń esebin elektrondy jáne qaǵaz nusqada tapsyrýǵa bolady, – dedi departament ókili.
Esep jylyna eki ret – 5 qańtar men 5 shildeden keshiktirilmeı aýdandyq jáne qalalyq basqarmalarǵa usynylýy tıis. Eger talap oryndalmasa, nysandar kelesi jylǵy profılaktıkalyq baqylaý josparyna engiziledi.
Buǵan deıin Atyraýǵa aı saıyn 12-13 myń tonna avtogaz qajet ekenin jazǵan edik.
