Qulsaryda jańadan salynatyn 100 turǵyn úıdiń irgetasyn quıý jumysy bastaldy
ATYRAÝ. KAZINFORM – Atyraý oblysynyń Qulsary qalasynda jańadan salynatyn 100 turǵyn úıdiń irgetasyn quıý jumysy bastaldy.
Atyraý oblysynyń tótenshe jaǵdaılar jónindegi jedel shtabynan habardar etkendeı, jańa turǵyn úılerdi «Bolashaq» shaǵyn aýdanynan bólingen jer telimine salý kózdelgen. Qazir 48 úıdiń irgetasyn quıý júrgizilip jatyr.
Atyraý oblystyq qurylys basqarmasynyń bas mamany Ernar Qadyrbaıdyń aıtýynsha, 80 úı «Qazaqstan halqyna» qoǵamdyq qorynyń qarajaty esebinen salý josparlanyp otyr. Al 20 úıdi salýǵa jergilikti bıýdjetten qarjy bólinedi.
«Qazir arnaıy bólingen jer teliminde beton tóseý jumysymen qatar irgetas, monolıt quıý atqarylyp jatyr. Qurylys alańynda ekskavator, avtotıeýish, avtoaýdarǵysh, avtokran sekildi basqa da tehnıkalar tartyldy. Bul jumys aıaqtalǵan soń jańa úılerdiń qabyrǵasyn kóterý úshin tas qalaý bastalady. Bul úshin jergilikti jerden qurylysqa qajetti ınertti jáne ózge de materıaldar tabylyp otyr. «Qazaqstan halqyna» qorynyń talaptaryna sáıkes, qurylysty júrgizetin merdigerler jergilikti mekemelerden tańdaldy», - deıdi Ernar Qadyrqul.
Onyń deregine súıensek, ár turǵyn úıdiń jalpy kólemi 100 sharshy metr. Jobaǵa sáıkes jańa úılerde 5 bólme bar. Onyń ishinde, as ishýge arnalǵan, eki jatyn, qonaq bólmesine qosa sanıtarlyq torap qarastyrylǵan.
«Oblys ákiminiń tapsyrmasyna sáıkes, Jylyoı aýdanyndaǵy tótenshe jaǵdaıǵa baılanysty turǵyn úı qurylysyna jumys kúshin tartý boıynsha lımıt sany kóbeıtildi. Qurylys jumystaryn «Orlan», «Armandastar-Atyraý» jáne «Kazkomservıs» JShS júrgizýdi qolǵa aldy. Bul kompanııalardyń árqaısysyna 50-ge jýyq jumysshy tartylyp otyr», - dep málim etti Ernar Qadyrqul.
Eske sala ketelik, buǵan deıin Qulsaryda salynatyn turǵyn úılerdiń qurylysy kúzde aıaqtalatynyn habarlaǵan edik.
