Qulsaryda jańa turǵyn úılerdiń qabyrǵasy qalanyp jatyr
ATYRAÝ. KAZINFORM – Qulsary qalasynda sý tasqynynan zardap shekken turǵyndar úshin qurylysy bastalǵan jańa úılerdiń qabyrǵasy qalanyp jatyr.
Atyraý oblystyq qurylys basqarmasynyń bólim basshysy Darhan Tilepbergenniń málimetinshe, Qulsary qalasyndaǵy «Bolashaq» shaǵyn aýdanynda 100 turǵyn úı salý kózdelgen.
«Qazir tasqynnan zardap shekken turǵyndarǵa arnalǵan 48 úıdiń irgetasyn quıý aıaqtaldy. Taǵy 52 úıdiń irgetasy quıylyp jatyr. Munda qurylys materıaldary jetkilikti mólsherde tasymaldandy. Turǵyn úılerdiń qurylysyn júrgizý úshin jergilikti kompanııalardan úsh merdiger tańdaldy. Jańadan salynýǵa tıis 80 úı «Qazaqstan halqyna» qory bólgen qarjyǵa salynady. Al, 20 úıdiń qurylysy jergilikti bıýdjet esebinen boı kóteredi. Qyrkúıek aıynda 100 úıdi paıdalanýǵa tapsyrý kózdelip otyr», - dedi Darhan Tilepbergen.
Onyń aıtýynsha, qurylys jumysyna 100 qurylysshy maman, 50 tehnıka tartylǵan.
Eske sala ketelik, budan buryn Qulsaryda tasqynnan zardap shekkender úshin 80 úı salýǵa 2,6 mlrd teńge bólingenin habarlaǵan edik.
«Qazaqstan halqyna» qorynyń baspaósóz qyzmetinen málim etkendeı, turǵyn úılerdiń avtorlyq dızaınyn «ETALON PROJECT GROUP» JShS daıyndaǵan. Bul seriktestik dızaınnyń saqtalýyna baqylaý júrgizedi. Al, tehnıkalyq qadaǵalaý «ZAF-Stroıservıs» JShS-ǵa júktelgen.
«Atyraý oblysynyń Qulsary qalasynda 80 turǵyn úıdiń qurylysyn júrgizýge 2 mlrd 640 mln teńge bólindi. Munda 1 úıdi salýǵa jumsalatyn qarjy 31 mln 975 myń teńgeni quraıdy», - dep habarladǵan edi qordyń baspasóz qyzmeti.
