Qulsaryda jańa temirjol vokzaly ashyldy
ATYRAÝ. KAZINFORM — Respýblıka kúni qarsańynda Qulsary qalasynda jańa temirjol vokzaly paıdalanýǵa berildi. 1970 jyldan beri jumys istep kelgen eski ǵımarattyń ornyna salynǵan jańa vokzaldyń aýmaǵy burynǵydan tórt ese úlken, dep habarlaıdy Óńirlik kommýnıkatsııalar qyzmeti.
Munda jolaýshylarǵa arnalǵan kútý zaldary, kassa, medıtsınalyq pýnkt, ana men bala bólmesi jáne júk saqtaý orny bar. Múgedektigi bar azamattarǵa da qajetti jaǵdaı jasalǵan.
Jobany Eastcomtrans kólik-logıstıka kompanııasy tolyq qarjylandyrdy. Qurylys aıaqtalǵannan keıin vokzal ákimdik balansyna óteýsiz berildi.
— Qoldaý kórsetip, osy mańyzdy jobanyń júzege asýyna úles qosqan «IstkomTrans» JShS-ne alǵysymdy bildiremin. Bul vokzal Qulsary qalasynyń áleýmettik jáne kólik ınfraqurylymyn damytýǵa qosylǵan mańyzdy úles dep bilemin. Jańa vokzal turǵyndarymyzǵa sapaly qyzmet kórsetip, jolaýshylar ıgiligine uzaq jyldar boıy qyzmet etsin, — dedi qala ákimi Qadyrjan Adınov.
Qulsary stantsııasy arqyly kún saıyn 10 jolaýshylar poıyzy ótedi. Olardyń qatarynda qalaaralyq, oblysaralyq jáne halyqaralyq tranzıttik baǵyttar bar. Vokzaldyń ortasha táýliktik jolaýshylar aǵyny 300 adamnan asady.
Qazir Atyraý oblysynda jeti temirjol vokzaly jańartylǵan. Al respýblıka kóleminde 124 temirjol vokzalyn jańǵyrtý baǵdarlamasy júzege asyrylyp jatyr.
