Qulsaryda úıdi baǵalaý qorytyndysymen kelisken 6 otbasy ótemaqyǵa ótinish berdi

ATYRAÝ. KAZINFORM – Atyraý oblysynyń Qulsary qalasynda tasqyn sý kirgen úıdi baǵalaý qorytyndysymen kelisken 6 otbasy ótemaqyǵa ótinish berdi.

Atyraý oblysynyń jedel shtabynan málim etkendeı, Qulsarydaǵy Mádenıet úıinde ótemaqy tólemin rásimdeý úshin turǵyndardan ótinish qabyldaý bastaldy. Zalaldy baǵalaý jáne óteý jónindegi komıssııasy ótemaqyny 14 kúnde tóleıdi.

«Men burynǵy úıimniń ár sharshy metrine 400 myń teńgeden suramaımyn. Maǵan kóńilinen shyǵatyndaı qarjy bergen qalaımyn. Sol sebepten, tasqyn sýdan búlingen úıimniń ár 1 sharshy metri 240 myń teńgeden baǵalansa, rızashylyǵymdy bildiremin. Eger meniń úıim 25 mln teńgege baǵalanyp, maǵan zalal úshin ár sharshy metrge 240 myń teńgeden tólengeni tipten tıimdi bolar edi. Qazir meniń otbasym úshin turǵyn úı máselesi óte ótkir tur», - deıdi Qulsary qalasynyń turǵyny Jaılash Muqanova.

Keltirilgen materıaldyq zalal úshin ótemaqy tóleý úshin qujattardy daıyndaý merzimi 10 kúnge sozylady.

«Qazir jyljymaıtyn múlikke tehnıkalyq tekserý jáne baǵalaý júrgizý jalǵasyp jatyr. Turǵyndardan 2940 ótinish qabyldanyp, 2727 ótinish qaraýǵa jiberildi. Tasqyn sýdan búlingen 2624 úıge baǵalaý júrgizildi, 2671 úıge tehnıkalyq tekserý júrgizildi. Osy kezge deıin 756 apatty úı dep tanyldy», - dep málim etti oblystyq jedel shtabtan.

Eske sala ketelik, buǵan deıin Qulsarydaǵy sý tasqynynan keıin apatty jaǵdaıda turǵan 756 úı anyqtalǵanyn habarlaǵan edik.