Qulsaryda úıi sýǵa ketken zeınetker qoǵamdyq shtabta erikti bolyp júr

ATYRAÝ. KAZINFORM – Atyraý oblysyndaǵy Qulsary qalasynda úıi sýǵa ketken zeınetker qoǵamdyq shtabta erikti bolyp júr.

Jylyoı aýdanynyń ortalyǵy – Qulsary qalasynda sý tasqynynan zardap shekken turǵyndarǵa keńes beretin qoǵamdyq shtab qurylǵan. Shtab quramynda 17 adam bar. 
Sonyń biri – Daırabaı Eldesbaev. Onyń úıin tasqyn sý basqan.

«Úıimiz sýǵa ketkende abdyrap, úreılenip qaldyq. Keıin zardap shekken turǵyndarǵa túrli keńes berý úshin qoǵamdyq shtab quryldy. Men de sol shtabqa múshe bolýǵa sheshim qabyldadym. Óıtkeni, ózim sekildi tosyn apattan qınalyp qalǵan turǵyndarǵa kómek kórsetkim keldi. Qoǵamdyq shtab qurylǵaly beri 3 myńnan astam turǵyn júgindi. Olarǵa quqyqtyq baǵytta keńes berip otyrmyz» -dedi Daırabaı Eldesbaev. 

Onyń aıtýynsha, qoǵamdyq shtab músheleri áleýmettik nysandardyń jumysyn qaıta bastaýyna atsalysqan. 

«Qulsaryǵa jetkizilgen gýmanıtarlyq kómek tórt pýnktten berilip jatyr. Dári-dármekterdiń medıtsına qyzmetkerleri arqyly muqtaj jandarǵa taratylýy qolǵa alyndy. Tasqyn sýdan zardap shekken turǵyndar materıaldyq kómek alǵysy keledi. Shtab músheleri olardyń tıisti qujatty jınaqtaýyna kómektesip otyr», - deıdi Daırabaı Eldesbaev. 

Eske sala ketelik, buǵan deıin Jylyoı aýdanynda 3461 otbasyna 1,277 mlrd teńgeniń bir rettik tólemi jasalǵanyn jazǵan edik.