Qulsaryda sý tasqyny saldarynan búlingen kópir qaıta jańǵyrtyldy

ATYRAÝ. KAZINFORM — Atyraý oblysynyń Qulsary qalasynda tasqyn sýdan búlingen kópir qaıta jańǵyrtylyp, iske qosyldy.

Jylyoı aýdany ákimdiginiń málimetinshe, bul kópir Qulsary qalasyndaǵy «Dostyq» shaǵyn aýdanynda ornalasqan. Qaıta jańǵyrtylǵan kópirdiń uzyndyǵy — 238, al, eni — 17,1 metr.

Byltyrǵy tasqyn sýdyń saldarynan búlingen kópirdi jańǵyrtý jobasyna Jylyoı aýdandyq jolaýshylar kóligi jáne avtomobıl joldary bólimi tapsyrys bergen. Qurylys jumystaryn «SK Kazalem» JShS atqarǵan.

Qulsary qalasynyń ákimi Qadirjan Adınovtiń aıtýynsha, byltyr kóktemde atalǵan kópirden kólik pen turǵyndardyń júrýine tyıym salǵan. 

— Bul kópir — tek qurylys nysany ǵana emes, turǵyndardyń qaýipsizdigi men kólik qatynasynyń kepili. Budan bylaı monoqaladaǵy kólik qozǵalysyn retteýge qolaıly jaǵdaı jasalady, — deıdi Qadirjan Adınov.

Eske sala keteıik, budan buryn Qulsaryda sý tasqyny saldarynan búlingen kópir jóndelip jatqanyn habarlaǵan bolatynbyz.